莎草紙
(由紙草跳轉過嚟)
莎草紙（英文：Papyrus）係古埃及人廣泛採用嘅書寫介質，佢用當時盛產於尼羅河三角洲嘅紙莎草嘅莖製成。大約喺公元前3000年，古埃及人就開始用紙草，並將呢種特產出口到古希臘等古代地中海文明地區，甚至遙遠嘅歐洲內陸同西亞。
依種紙纖維質好勁，所之耐用。之但係怕濕，一潮濕就會發霉腐爛。古希臘羅馬曾經好流行，家陣就無乜留低。古埃及就反而有多啲文物出土。後尾畀羊皮紙，以及西傳造紙術所取代，因而失傳。
製法
紙莎草莖（讀框陰上聲）去外皮，就見到內層黐黐地。內層切片成條，長約四十公分。喺硬面上，條長邊疊長邊，就會變成一大片。之後，以直角方向，又喺上面同樣方疊多一層，兩層就橫直相交。由於製法失傳，斷估去皮後，條或放過落水長浸，等佢黐得住，又或者兩層要黐埋[1]。尚濕之時，兩層要揼實，打到兩層變一片。之後壓到乾。乾咗就用圓嘢轆磨，斷估係石，或貝，或圓木[2]。
造成一張之後，會切到指定大細。又或者，一直黐埋駁長，成一大卷，到至後一張，就用附上木棍，方便處理[3]。要造長卷，紙嘅橫直方向一致。一面全橫，一面全直。卷嘅長邊為正面，條紋打橫，順住方向寫，多數文書都寫依邊。有時卷會翻用，就寫喺背面。
