都市聯通
都市聯通（英文同法文[1]：Metrolinx）係加拿大安大略省負責策劃大多倫多及咸美頓地區（GTHA）嘅公共交通嘅政府機構，除咗做宏觀嘅策劃之外，亦都喺大多地區起新鐵路，並透過三間子公司營運區入面嘅部份巴士同鐵路，同埋喺 GTHA 同渥太華用緊嘅 Presto 卡付款系統。2006年成立，初頭叫 Greater Toronto Transportation Authority（簡稱 GTTA；法文：Régie des transports du grand Toronto），2007年12月4號改牌子名做 Metrolinx[2]，2009年正式立法改名[1]。
爭議
都市聯通歷年來涉及唔少爭議，例如做工程做嘅諮詢被指係假諮詢，好多時都只係門面工夫、先斬後奏、甚至講咗唔算數。話佢有問題嘅包括普通市民、市議員[3]、加拿大原住民[4]，甚至多倫多市長[5]。
例如佢解釋艾靈頓跨城西延綫嘅高架路段嗰陣，就有居民指佢啲圖係誤導[5][6]。2022年尾，因為起安大略綫要喺奧斯古德站做工程，又就打算唔問就走去斬樹，結果安省律師公會走去申請法庭禁制令，延長禁制令失敗之後即刻有原住民團體再申請禁制令，直指都市聯通冇做真諮詢[7][4]。2016年答應 Jane 街夾芬治大道附近低收入社區，喺艾靈頓跨城輕鐵綫車廠附近畀地畀佢哋起社區中心[3]，2020年反口，話冇權畀地，要跟市價賣[8]，居民反對多個月之後先至再次應承真係畀地[9]。
