金雪松

金雪松喺金正日同金英淑結婚之後第二年出世，由阿爺金日成親自起名「雪松」^[1]。據一名任職過高層嘅脫北者所講，金雪松身高165公分，高鼻大眼，頭髮長到腰，聰明靚女^[1]。

金雪松喺阿爸嘅母校金日成綜合大學畢業，同阿爸一樣主修政治經濟學科^[2]。而佢本身嘅藝術同文學修養都好高^[2]。

據南韓情報部門調查所知，金雪松試過喺2005年秋天以留學生身份逗留法國^[1]。

金雪松自大學畢業後，曾被安排到朝鮮勞動黨中央委員會宣傳鼓動部負責文學領域工作，重幫金正日喺上傳到宣傳鼓動部嘅文學作品上面代筆簽名^[1]。

自1990年代尾開始，金雪松負責金正日嘅隨行保安同埋日程編排。佢着住有中校肩章嘅軍服，陪金正日出去視察軍隊、巡察地方工廠同企業、出席國務活動等^[1][2][3]。2002年跟過金正日訪問俄羅斯遠東地區^[1]。

由於金雪松長年跟喺阿爸左右，幾得阿爸鍾意。金正日曾經唔止一次對人話個囡「有頭腦、有能力」，有好多地方似佢自己^[3]。

同金正恩嘅關係

2011年12月金正日死後，英國《每日電訊報》有評論認為，由於繼承人金正恩嘅經驗重淺，金雪松可能會同姑丈張成澤（朝鮮前國防委員會副委員長）、同父異母阿哥金正男進行權力鬥爭^[4]。2013年亦有報導話隨住異母妹妹金與正（金正恩同父母胞妹）受重用，直接負責金正恩參加嘅所有活動，金雪松同老公申福男（音譯）已經被調至其他支援崗位^[5]。

但係有另外嘅意見認為金雪松同金正恩嘅關係並唔係好似之前推測咁敵對或者冷淡，相反兩者關係好密切。美國海軍分析中心國際關係局局長高斯喺2014年6月10號接受自由亞洲電台訪問時話，佢認為金雪松可能做徂金正恩嘅核心顧問，喺政權入面控制情報脈絡嘅核心地位。而且金與正係由金雪松負責培訓成為佢嘅職務嘅接班人^[6]。另外，韓國在野黨新政治民主聯合國會議員洪翼杓喺2013年引述中國嘅朝鮮消息人士話，金雪松同老公曾主導肅清姑丈張成澤嘅行動^[7]。