阮文追
阮文追（越南文：Nguyễn Văn Trỗi，1940年2月1號—1964年10月15號），係一個越南刺客，因為試圖趁當時嘅美國國防部長羅拔·麥克納馬拉同新任美國駐越南大使小亨利·卡伯特·洛奇響1963年5月訪問南越嘅時候暗殺佢哋而俾人拉咗，之後處死[1][2]。
處決
阮文追俾人處死嘅時候年僅24歲。因為有個委內瑞拉嘅革命組織綁架咗美國空軍中校，用人質嚟威脅美國唔處死阮文追，佢曾經獲得緩刑，但係之後人質被救出，阮文追都被處死[3]。
阮文追係第一個俾人公開處決嘅越共成員，佢嘅行刑過程都俾人影低[4]。阮文追臨死前都響度反抗，同攝影記者講：「你係記者，你一定要知到底發生咗乜事。美國人侵犯我哋國家，用飛機同炸彈殺我哋嘅人民……我無違背我嘅同胞嘅意願，我嘅行動係針對美國人。」當牧師想請求神赦免佢嘅罪嗰陣，佢拒絕咗：「我無犯罪，有罪嘅係美國人。」佢又唔肯戴眼罩，堅持要「睇住母國大地」[5]。
佢嘅遺言係：「越南萬歲！」[2]
影響
阮文追死後俾北越尊為烈士。1965年10月15號，北越發行嘅新郵票擺嘅就係阮文追嘅肖像[6]。佢成為北越嘅民族英雄，個名俾人用嚟命名大學同獎項。家陣大多數越南城市都有一條以阮文追為名嘅街道，而胡志明市嗰條當年阮文追暗殺麥克納馬拉嘅街就命名為「阮文追大道」[7]。響峴港都有一座跨越漢江嘅大橋以佢為名。
越南以外都有國家紀念阮文追，其中以社會主義島國古巴紀念最多。關塔那摩有一座公共體育場以阮文追為名；響首都哈瓦那嘅阮文追公園裡面更加有佢嘅銅像，亦都有學校同醫院以佢命名。西方世界都有人紀念佢，例如反戰影星珍·芳達就將佢同第二任丈夫湯姆·海登個仔改名做特洛伊·加利帝（Troy Garity）[8]。