𨳍
𨳍（粵拼：cat6）[註 1]係粵語粗口五字之一[1]，正寫同原意皆未查明，眾説紛紜。坊間普遍認為佢代表男人下陰嘅全部或者部分，不過佢多數嘅口語用法同性無關。
其他方言
喺部分南番順方言同埋絕大部份西部粵語，𨳍多為圓脣音，而唔同於「七」音；喺區分舌尖、舌面音嘅方言入便讀舌尖音，唔同於「出」音：
流行意思
黃霑本《不文集》寫道：「七是大而軟的，故稱大而無當，不靈不活者曰笨七。[註 2][2]」家陣好多人視呢句嘢為「𨳍」嘅標準釋義，經常引用佢。
本字考究
個別理論
𡴶／𫵱：彭志銘指其意思為膥袋；個字收錄於馬奕猷戥Theodore F. Wempe嘅《The Student's Cantonese-English Dictionary》[3]、馮田獵嘅《粵語同音字典》同李卓敏嘅《李氏中文字典》[4]。
勢：詹憲慈喺《廣州語本字》話可以指男陰嘅呢個字，經過音轉就得出而家用緊嘅版本。
蔡：黃氏嘅《粵語古趣談三編》推敲，「蔡」可以解「龜」，「龜」又可以表示「陰莖」，因而「蔡」都有「陽具」呢個解法，經音轉得出家陣嘅音。
七／柒：曾焯文認為，據《周易》，數目「七」（同「九」）都係陽物象徵，加上音轉，就形成而家興嗰個音咯[5]。至於「柒」，係「七」嘅大寫。
赤／出／cheat：「赤佬」喺吳語當中經常用嚟鬧人，而「赤」嘅呢種用法唔知點樣傳咗入去粵語道[6]，發音轉變唔大……張濟和推斷「赤」係當中嘅本字[7]，李碧華相信其正寫乃「出」[8]，朱大可認為佢係（英文）「cheat」嘅擬音字[9]。
綜合而言
「𨳍」嘅本字可能指膥袋同㞗之一或者兩樣加埋，又話唔定根本同陰部無關；以上理論，通通錯澌或者多過一套啱，都有可能；有唔同意思嘅兩個甚至更多本字，隨着時間流逝，逐漸俾人撈亂當係一樣都唔出奇。不過無論點樣，自命有教養嘅人，都會對呢類字棹忌，唔畀佢哋登大雅之堂，偏偏所謂市井之徒會慣咗成日求其公開咁講，而且多數用作粗口[10]。於是，長年冇有識之士為呢啲學問著書立説，普羅大眾又懶得深究噉人云亦云，此消彼長之下，到而家可以表達出嚟嘅意思已經變得含糊不清，更係難以考究[11]。
俗字考究
背景介紹
每當想排解有音冇字嘅煩惱，唔理文人定係市井，無論嚴謹查證、穿鑿附會定係求其創作，都會有所依據[12]。
逐個分析
𨳍：此乃近代新造嘅形聲字。呢個字以「門」表形（坊間假設其本字解男子陰。），以「七」表聲（呢個字簡單兼近音。）……其創作原理同其餘四個所謂廣東話粗口字之流行寫法嘅一致。[13]
杘：此乃個別人士憑空杜撰出來穿鑿附會嘅「僞正字」[14]。形——其餘四個所謂廣東話粗口字之大致公認正寫均同佢一樣有「尸」呢個部件。但查證後證明佢唔係「尸」部首，只係「木」部、「尸」聲嘅形聲字。[15]音——孔仲南著嘅《廣東俗語考》寫「杘—音七。[16]」，聲稱發音似乎接近。但有考證指出審音有誤[17]。義——坊間及學界多數假設其本字解男子陰，然而佢哋喺古籍之中耖唔到佐證，唯有作出五花八門嘅揣測……字書寫「杘」解「絡絲車的搖把。」而「墨杘」解「猶豫不前或狡猾無賴。」[18]，冇性嘅意思兼唔算粗俗；彭家發話「杘」解男子陰，不過唔提及何以見得。
「𨳍」字用法
- 名詞，陰莖嘅意思，量詞係「碌」。例子：
- 碌𨳍六七吋，隊到好𡳞遠。（碌嘢長達六七吋，延伸到好遠嘅地方。）
- 形容詞，形容過咗時、好難睇、笨拙嘅形象，又可以指明形容思想，係好鮮明嘅形容用字。例子：
- 條友好𨳍（嗰個人嘅外表好過時、難睇、笨拙。）
- 條友啲思想好𨳍（嗰個人嘅思想好過時、笨拙。）
- 𨳍頭𨳍腦（笨笨拙拙，傻更更嘅。）
- 𨳍咗！（蠢咗。多數用喺發現自己做咗一件蠢事嘅自嘆。）
- 𨳍頭皮！（陰莖放喺頭皮上。）
- 玩乜𨳍嘢呀？（「玩夠未呀！？」；有就嚟發難嘅意味。）
- 邊𨳍個呀？（「究竟邊個呀？」；同上。）
- 搞乜𨳍呀？（「究竟喺度做乜呀？」；有嫌人阻掟嘅意味。）
- 點𨳍知！（「我點會知道？」；有真係唔知，要人唔好再問嘅意味。）
助詞例
打𨳍佢！ 將佢打到變成好難睇嘅樣！
- 其實都係將嗰個人打到好慘嘅詞語，但係如果呢度換咗個「㞗」字，意義層面上就會有少少唔同。箇中嘅學問係於：「前者有着重於得出嚟嘅結果，要打到佢變晒型咁先至肯收手；而後者呢就着重於個過程，總之狠狠咁打佢一餐，令到佢知痛嗌晒救命咁就可以。」由此可見，唔係每個詞語都可以將助語粗口字求其替換使用（可以參照「㞗」字嘅《「㞗」字作助詞用嘅其它例子》）。
形容詞例
貌似北京狗，𨳍到冇人有。 市井創作俗句之一，即係話：樣貌好似隻北京狗噉，難睇笨拙到冇人比得上。
注：𨳍到冇人有，可以用𨳍到冇朋友 代替（難睇笨拙到識唔到朋友或者由有朋友變成冇朋友）
文法
「𨳍」同「㞗」用法相同，但係根據已故才子黃霑著作《不文集》描述，「𨳍」同「㞗」嘅分別係──「㞗」勃起係硬嘅，而「𨳍」勃起但就係軟嘅。所謂「戇㞗」同埋「笨𨳍」，平時兩個詞語同樣都係形容人愚鈍癡呆嘅，但係實際層次上亦有唔同：前者係指條嘢好易衝動咁胡亂勃起，後者就係連勃起都冇力嘅樣；所謂唔應該硬而硬嘅係「戇㞗」，應該硬但係唔硬嘅就係「笨𨳍」。總括嚟講，「𨳍」係形容呆笨愚鈍嘅粗口專用字。
「𨳍」字係使用率最少嘅廣東粗口字。佢雖然可以作為語氣助詞，一樣係夾雜喺句子裏面，但係好多時讀起上嚟都唔係幾順口。「𨳍」字除咗用嚟做形容詞之外，應用嘅範圍其實唔係多，所以多數俾人用嚟創作一啲市井嘅句子或者俗語。
常見單獨字句應用
𨳍頭／𨳍碌 指外表過時、難睇、笨吓笨吓嘅人，亦可單單指髮型。
𨳍頭皮 同樣係對人用嘅詞語，多數指男性，但係侮辱力唔係太強，亦冇一定嘅意思；多數用嚟作為同比較熟朋友嘅玩笑式稱呼。例如：「喂𨳍頭皮，今晚落老蘭蒲預埋你呀！」（喂衰嘢，今晚去蘭桂坊飲酒消遣預埋你嗰份呀！）
笨𨳍／𨳍咕碌 形容超級笨拙嘅人；「笨𨳍」有時讀／寫歪成笨實避諱。
𨳍棘 原本係指龜頭同陰莖之間交接嘅凹陷地方，但係呢個詞語就多數用嚟形容超等笨拙嘅人。因為「𨳍棘」呢個位置多數俾包皮遮掩，於是亦可以引申形容嗰啲行為鬼崇古惑，出爾反爾嘅人。
𨳍下𨳍下 同「㞗下㞗下」同埋「烚下烚下」同樣係指人呆鈍，但係爆得粗口嘅話，啲人多數會用「𨳍下𨳍下」。
切𨳍 將㞗切咗去。
𨳍是我碌強 市井創作俗句之一，男性用嚟自誇嘅句子，意思係㞗之中我係最強嘅。
𡳞到用時方恨𨳍 市井創作俗句之一，意思係話到咗要用㞗嚟做愛嘅時候，先至悔恨自己平時冇乜鍛練，搞到而家抬唔起頭。
切𨳍煲湯派街坊 市井創作俗句之一，用嚟鬧嗰啲冇咩用嘅人。例句：你都係冇𡳞用㗎啦，不如切𨳍煲湯派街坊好過啦！（睇你做乜都唔掂咁冇鬼用，不如將㞗切出嚟煲湯，然後分畀啲左鄰右里好過啦。）
𨳍𡳞懵懵食甜筒 市井創作俗句之一，形容好似舔著雪糕咁呆呆鈍鈍嘅人。
吮𨳍 同「含𡳞」一樣，指口交。