Getal van die dier
666 (seshonderd ses en sestig) is die natuurlike getal ná 665 en voor 667.
In die Christendom word in die meeste manuskripte van Openbaring in die Nuwe Testament daarna verwys as die getal van die dier.[1][2] Papirus 115 (die oudste bewaarde manuskrip van Openbaring) sowel as ander antieke bronne, soos Codex Ephraemi Rescriptus, gee die getal van die dier aan as χιϛ of χιϲ, wat in Arabies gelykwaardig is aan die getal 616, nie 666 nie.[3][4]
"Mens se getal"
In die Textus Receptus-manuskripte (oorgelewerde Griekse teks) van die Nuwe Testament beweer die boek Openbaring kripties 666 is "'n mens se getal". Dit word verbind met "die naam van die dier of die getal van sy naam".[5] Dié dier is 'n antagonistiese wese wat sowat twee derdes van die begin van die apokaliptiese visioen af voorkom. In die oorspronklike Koine-Griekse teks word die simbole χξϛ (chi ksi stigma) gebruik, terwyl die getal in ander manuskripte uitgeskryf word.[6]
In die moderne kultuur het 666 een van die algemeens erkende simbole vir die Antichris geword, of alternatiewelik vir die duiwel. Sommige mense neem die verbintenis van die getal met Satan so ernstig op dat hulle enigiets wat met 666 verband hou, vermy. Dit staan bekend as "heksakosioiheksekontaheksafobie".
Die getal van die dier word in sommige vroeë Bybelse manuskripte aangegee as 616. Die vroegste hiervan is Papirus 115.[7][8]
Nero
Wanneer 'n getalswaarde aan name gegee word, word "Neron Caesar" uit Grieks in Hebreeus getranslitereer as נרון קסר (kort spelling), en dit gee die getal 666. Die Latynse spelling van "Nero Caesar" word in Hebreeus getranslitereer as "Ktiv haser", נרו קסר, en dit gee die getal 616. In die Bybel kon 666 dus 'n gekodeerde verwysing na Nero gewees het; hy was van 55-68 n.C. die Romeinse heerser.[9]
Sien ook
Verwysings
Skakels
Wikimedia Commons het meer media in die kategorie Getal van die dier.
Hierdie artikel is in sy geheel of gedeeltelik uit die Engelse Wikipedia vertaal.
