Tortillatjip
'n Tortillatjip is 'n peuselhappie wat van mielietortillas gemaak word. Dit word in driehoeke gesny en dan gebraai of gebak. Hoewel dit in die laat 1940's die eerste keer in Kalifornië in die VSA in massa vervaardig is,[1] het dit voortgevloei uit Mexikaanse geregte, waarin soortgelyke items soos totopo's en tostadas reeds bekend was.[2]
| Tortillatjip | ||
 | ||
| 'n Bord tortillatjips met salsa en guacamole. | ||
| Soort gereg | Peuselhappie | |
| Land | Mexiko en VSA | |
| Hoofbestanddeel | Tortillas | |
Hoewel hulle gewoonlik van geelmielies gemaak word, kan ander soorte mielies ook gebruik word. 'n Tortillatjip wat bedoel is om gedoop te word het gewoonlik min sout op, terwyl ander verskeie geure kan hê.
Tex-Mex- en Mexikaanse kos
Tortillatjips is 'n belangrike aptytwekker in die Tex-Mex- en Mexikaanse kookkuns. Die gewildheid daarvan buite Kalifornië het in die laat 1970's begin uitkring. Hulle word gewoonlik saam met 'n doopsous voorgesit, soos salsa, chile con queso of guacamole. As hulle nie saam met 'n doopsous voorgesit word nie, is hulle gewoonlik gegeur met kruie en speserye.
'n Ander gereg wat van tortillatjips gebruik maak, is nacho's. Nacho's het in die 1940's in Mexiko ontstaan. Nacho's is tortillatjips wat voorgesit word met gesmelte of gerasperde kaas, hoewel ander bolae ook gebruik kan word, soos vleis, salsa, bone, guacamole, suurroom gekapte uie, olywe of jalapeño's.
Mielietjips
'n Soortgelyke mielieversnapering is 'n mielietjip, wat nie van 'n tortilla gemaak word nie maar van mieliemeel wat in 'n sekere vorm geprosesseer word. Fritos is 'n voorbeeld hiervan.[3]
Verwysings
Skakels
- Olsson, Karen. "Why Are Tortilla Chips So Damn Good?" - Texas Monthly - September 2009
- Tortilla Industry Association "http://www.tortilla-info.com"
Wikimedia Commons het meer media in die kategorie Tortillatjip.
Hierdie artikel is in sy geheel of gedeeltelik uit die Engelse Wikipedia vertaal.
