Beyoncé Knowles

Vorherigs Läbe ond Karrierestart

D Knowles esch im Johr 1981 as erstgeboreni vom Mathew Knowles ond de Tina Beyince z Houston, Texas uf d Wält cho. Sie esch di öuter Schwöschter vo de Solange Knowles, e Songwriterin, Schouspelerin ond Sängerin. Knowles het verschedeni Schuele bsuecht, wo sie dete scho ehres Talänt het chönne onder Bewiis stelle. Si het Gsangs- ond Tanzonterrecht gnoh ond am örtleche Chelechor metgsonge.

1990 het d Knowles gmeinsam met de LaTavia Roberson ond ehrne Schuelfröndinne Kelly Rowland, LeToya Luckett, Keke Wyatt und Ashley Támar Davis d Tanz- ond Gsangsgroppe Girls Tyme gröndet. Gmanaged vo ehrem Vater Mathew ond ikleidet vo de Muetter Tina, eschs i de Band dor zahlrichi Uftrett i Gsangswettbewerb ond Ichoufszentre glonge, uf lokaler Äbeni z'bekannt wärde. Wo si en Plattevertrag met Elektra Records ergattert hend, het mer usem Quartett Knowles, Rowland, Luckett ond Roberson de Groppename im Johr 1993 i Destiny's Child omgändert.

Destiny's Child

In lokale Events sin Destiny's Child zäme ufträtte ond noch vier Johre esch s Quartett im Johr 1997 zu Columbia Records gwächslet. Im folgende Johr hend sie ehres Debut-Aubom Destiny's Child usebrocht, bi dem ehre ersti Hit "No No No" enthalte esch. Witeri Chart-Erfolg hend met de Tetle "Bills Bills Bills" ond "Say My Name" gha. Vom zwöite Aubom The Writing's on the Wall send meh as sebe millione Verchöif bestätigt worde.

Am Höheponkt vo de Karriere hend sech zwöi Metgleder vo de Band glöst. Dor das hend Destiny's Child di zwöi nöi Metgleder d Michelle Williams ond d Farrah Franklin ufgnoh. D Farrah Franklin het d Groppe jedoch nor noch sächs Mönet us interne Problem verloh ond somet esch usem Quartett es R&B-Trio entstande.

S Trio het de Tetu "Independent Women Part I" ufgnoh wo de Soundtrack zum Kinofilm Charlie's Angels gse esch. Im Mei 2001 esch ehres drette Studioaubom erschene wo Platz 1 in USA, Grossbritanie, Düütschland, Öschtriich, Belgie, Niderland ond onderanderem au i de Schwiiz erreicht het. Noch de Wälttournee hend sech d Wäg vo de Bandmetgleder im Johr 2002 vorerscht wäg de Solokarrierene trennt.

Zwöi Johr spöter, 2004, hend sech d Rowland, d Knowles ond d Williams ernöit troffe om ehres vierte Studioaubom Destiny Fulfilled ufznäh. S Aubom het sech öber 6 Millione mou verchouft ond met de Tetle "Lose My Breath", "Soldier", "Girl" ond "Cater 2 U" send ehne witeri Top 10-Hits glonge. Im Aprel 2005 hends ehri Wäuttournee Destiny Fulfilled ... And Lovin' It gstarte, wobi sie bi ehrem Barcelona, Spanie -Bsuech verköndet hend, dass sie sech ändgöutig trennid.

Solo-Karriere

Im 2002 esch sie met ehrere Rolle als „Foxxy Cleopatra“ im Film Austin Powers: Goldständer gross usecho ond het de groovig Tetusong "Work It Out" dezue bigstürt. Nochdem Williams ond Rowland bereits ehri Solo-Bemüehige gmacht hend, het Knwoles ehres Debut-Soloalbom Dangerously in Love im Juni 2003 veröffentlecht. Vier Veröffentlichige vo ehrem Aubom hend Top 10 vo de Charts erklomme, onder anderem "Crazy In Love", es Featuring metem Rapper Jay-Z, ond "Baby Boy", zäme metem Sean Paul, wobi bedi Singles im Sommer ond Herbscht 2003 henderenand Platz 1 vo de Charts beleit hend ond jewils met Platin uszeichnet worde send.

Witerfüehrend het sie ehri Film-Karriere metem Kinofilm Der Rosarote Panther, i de Rolle vo de „Xania“, zäme metem Steve Martin, wo de Inspektor Clouseau gspöut het. De Film het im Februar 2006 in USA Premiere gfiiret ond het i de erste Woche bereits $21.7 Millione Billetverchöif zöuht. D Knowles het zudem de Tetusong "Check On It" ufgnoh, featuring Slim Thug, ond het met dem Song d Spetzi vo de US-Charts erreicht ond das esch somet ehre erschti Nommer-1-Hit vomene Soundtrack.

Ehres zwöite Studioaubom B'Day esch am 4. September 2006 wältwit erschene. Es esch eigentlech vörs Johr 2004 plant gse, jedoch het sie s Aubom mösse hendereschiebe wöu sie met de Destiny's Child s letschte Aubom ufgnoh het. D Knowles het metem Rich Harrison, Rodney Jerkins ond em Sean Garrett z New York gschaffet. Enerhalb vo drüü Woche es Aubom komplett gse ond Knowles het alli Songs Co-gschrebe ond Co-produziert. Lead-Single vom Aubom esch "Déjà-Vu" gse, es featuring metem Jay-Z ond het sech ufem Platz 1 vo de UK-Charts gsecheret. Die zwöit internationali Single vo veröffentlecht worde esch, esch "Irreplacable" im Oktober 2006 gse. I de Länder Nöiseeland, Irland, USA ond Auschtralie het sie chönne en Nommer-1-Hit lande. Knowles het ehres Aubom B'Day Re-released ond het e Deluxe Version veröffentlecht. In Präsänz vom ehrem Aubom het Knowles ehri lang The Beyoncé Experience Konzärt-Tour am 10. Aprel 2007 z Japan gstartet ond het am 30. Dezember 2007 ehres letschte Konzärt in Las Vegas gä. Met de Tour het si öber 90 Grossstädt bsuecht.

Im am 5. Dezember 2008 erschenene Kinoföum Cadillac Records het d Knowles d Rolle vo de amerikanische Soul-Sängerin Etta James öbernoh, wobi sie de Ufseg ond Fall vo de James ehrem Musig-Label Chess Records zeigt.

Im Joor 2008 ghört d Beyoncé Knowles zu de Topverdiener. Luut de Forbes-Liste esch d Knowles met 87 Millione Jooresichomme ufem Platz drüü, Platz eis esch d Madonna met 110 Millione, gfolgt vo de Celine Dion met 100 Millione Iinahme.^[4]

Beyoncé Knowles het ehres drette Abuom I Am... Sasha Fierce am 14. November 2008 i de USA veröffentlecht. Am 7. November 2008 esch d Single "If I Were a Boy" erschene.^[5] "If I Were a Boy" esch ide Schwiiz dor reini Downloads ufe Platz 5 cho.^[6] Während dem, dass "If I Were a Boy" ide Charts gseh esch, esch s Lied "Single Ladies (Put a Ring on It) ad Spetzi vo de Irische-, Schwedische- ond US-Charts klätteret ond het i Länder wie: Ängland, Törkei ond Kanada au e grosse Erfolg chönne verbueche. Als dretti Single esch s Lied "Diva" plant xeh, wo bereits scho vor Veröffentlechig uf Platz 82 ide USA glandet esch ond de Song "Halo", wo im erschte Quartal 2009 publiziert worde esch. De Song "Ego" esch einzeln en Amerika-Veröffentlechig xeh, wobii d Knowles dezue de Rapper Kanye West als Gastvocal gnoh het. Als sächsti wäutwiti Veröffentlechig esch met "Sweet Dreams" en globale Top-Ten-Hit ufe Markt cho. För ehri vo I Am... Sasha Fierce Platinum Edition z'promote het d Beyoncé Knowles "Broken-Hearted Girl" veröffentlecht. Als achti ond vorussechtlech letschti Single vom Albom I Am... Sasha Fierce het si zäme met de Pop-Sängerin Lady GaGa s Lied "Video Phone" publiziert.^[7]

För de Föum Obsessed spöut d Knowles näbem britische Schouspeler Idris Elba ond de amerikanische Schouspelerin Ali Larter. De Kinoflim esch im Aprel 2009 ide USA ond im Sommer 2009 international veröffentlecht worde. De Föum het sech am Eröffnigs-Wochenänd ide USA ufe Platz 1 positioniert ond insgesamt $28.6 Millione ignoh.^[8]Im Früehlig 2009 het osserdem ehri drett Wält-Tournee, d I Am... Tour, gstartet, wobii d Knowles vo Amerika, Afrika, Europa, Asie bes zu Australie usgwählti Städt bsuecht.

För die MTV Video Music Awards-Verastaltig, wo am 13. September 2009 stattgfonde het, esch d Beyoncé in ganze nüün Kategorie nominiert xeh.^[9] Sie het d Verastaltig als grossi Abrühmerin döffe verloh met insgesamt drüü Priise, dronder de Priis för ehres "Single Ladies"-Video als Video des Jahres.^[10] För d Grammy-Awards 2010, de bedütensti Musigpriis, esch d Beyoncé zäh Mou nominiert. Somet het d Beyoncé bereits im Vorfäld als grossi Favoritin för de wechtigst Musigpriis vo de Wäut gältet.^[11] Insgesamt het sie 6 Grammy-Awards chönne verzeichne, was zuvor no kei wiiblechi Könstlerin vorher gschafft het.^[12]

Am 13. Dezember 2013 het d Knowles ehres 5. Studioalbum veröffentlicht, wo de Titel Beyoncé trait.

Nöij Projekt

S Management vo de Beyoncé verhandelt inzwösche meteme Bitrett bi de US-Serie Desperate Housewives.^[13] Im Juli 2009 esch bekannt gä worde, dass d Knowles Interässi anere Nöijuflag vom 1992 produzierte Föum Sister Act hätti, d Beyoncé Knowles wörd gärn d Rolle als Nonne vo de früehner gspellte Whoopi Goldberg öbernäh.^[14] D Knowles het es Agebot vom Hotel Caesars Palace, dass sie en Dauershow dorchführt ond ganzi $750'000, omgrächnet 510'000 Euro pro gmachte Uftrett öberchonnd.^[15][16]Luut de Knowles sett esch plant sie d Veröffentlichig för ehres nöchste Aubom bereits im Joor 2010. Das hett sie bim letschte Konzärt in Ängland vo ehrere erfolgriiche I Am... Tour verluutet.^[17]

Albums

EPs

Singles

¹ teilwiis met "Single Ladies" as B-Side.
² teilwiis met "Diva" as B-Side.
³ teilwiis met "Ego" as B-Side.
⁴ teilwiss met "Video Phone" (feat. Lady GaGa) as B-Side.

• 2001: Carmen: A Hip Hop Opera als Carmen Brown.
• 2002: Austin Powers in Goldständer als Foxxy Cleopatra
• 2003: The Fighting Temptations als Lilly
• 2004: Fade to Black als Beyoncé Knowles
• 2006: Der Rosarote Panther als Xania
• 2006: Dreamgirls als Deena Jones
• 2008: Cadillac Records als Etta James
• 2009: Obsessed als Beth Charles
• 2009: Desperate Housewives als Gaschtuftrett¹

¹ werd no abklärt

 Commons: Beyoncé Knowles – Sammlig vo Multimediadateie

• Offizielli Homepage (änglisch)
• Kanal von Beyoncé Knowles uf YouTube
• Beyoncé Knowles bi Allmusic (änglisch)ID fählt
• Beyoncé Knowles bi Discogs (änglisch)
• Beyoncé Knowles bi MusicBrainz (änglisch)
• Beyoncé Knowles in de Internet Movie Database (änglisch)