Häitersbärg

Er ligt im Oschte vom Aargau. Dr Bärg isch öppe 13 Kilometer lang und ligt zimli gnau i dr Nord-Süd-Richtig. Dr höchscht Platz drufobe isch uf dr Hööchi vo 787 m ü. M.. Der Bärg ligt uf de Gmeindbänn vo vierzää Gmeinde.

Im Weschte ligt s Tal vo dr Rüüss, im Oschte s Limmattal un d Reppischtal. Gäge s Limetaal abe isch dr bärg vill stotziger weder gäge s Rüüsstaal. uf dr Oschtsyte het’s au meh Wald und vill Bech i de Runse. Am Bärg sind es paar Naturschutzpiet, bekant sind bsunders dr Egelsee un dr Tüüfelschäller.

Ufem Häitersbärg het’s vil Wald und numen es paar grodeti Flechine, wo zum Puure bruucht wärde.

S nördliche Ändi vom Bärgrugge ligt uf em Gebiet vo dr Gmeind Bade bim Chrüzlibärg uf (513 m). Gäge Süde hii chöme de d Baregg (531 m), dr Oberhau (617 m), dr Rüslerhau (649 m), dr Sennebärg (701 m), dr äigetlechi Häitersbärg (787 m) un schliesslech no dr Hasebärg (782 m). Vo dämm us goot’s abe zum 551 Meter höche Mutschellepass, wo d Passhöchi uf 511 Meter ligt. Und de chunt no wyter im Süde dr Holzbirrlibärg mit em Wald Grosshau.

Uf em Bärgrugge lige nur wenigi Wyler:

• Rüsler, i dr Gmeind Nöiehof, uf (632 m)
• Sennebärg, i dr Gmeind Chillwange (658 m)
• Häitersbärg, i dr Gmeind Schpreitebach (648 m)
• Sennhof, i dr Gmeind Remetschwil (644 m)
• Oberschönebärg, i dr Gmeind Bergdietike (671 m)
• Hasebärg, i dr Gmeind Wiide (696 m).

Uf en ere Gländterrasse über em Rüüsstal ligge d Dörfer Oberrohrdorf, Remetschwil un Bellike.

Über die ganzi Hööchi git’s vier Stroosse, wemme d Näbewääg un d Waldwääg nit miträchnet.

Under em Bärg dure het’s zwöi Tunäll:

• s Bareggtunäll vo dr Autobahn A 1
• s Häitersbärgtunäll vo dr Ysebaan Bäärn–Züri

Über die ganzi Lengi vom Häitersbärg goot e schööne Wanderwääg: me gseht an es paar Plätz wyt über s Land yne.

 Commons: Häitersbärg – Sammlig vo Multimediadateie

• Panoramawanderung über den Heitersberg. Dietikon - Egelsee - Heitersberg - Baden uf wanderungen.ch