D Matthyskiirche z Baasel

D Matthyskiirche in dr Stadt Basel isch e evangelisch-reformierti Kiirche im nöigotische Stiil, wo zmidzt uf em Matthysblatz im Matthys Gwardier stoot. Iir Durm isch 80 Meter hooch und eso isch si die höggsti Kiirche z Baasel, hööcher as s Münster (62.7 Meter), d Antoniuskiirche (62 Meter) und d Elisabethekiirche (72 Meter).

D Kiirche isch vo 1893 bis 1895 noch Blään vom Felix Henry us Breslau baut worde. Si bestoot us Sandstäi, wo dennzumol hüfig brucht worde isch und wo in de Vogese nid wit äwägg abbaut worde isch. Dr Soggel bestoot us Gotthardgranit und druf si Bruchstäi und Ziegelstäimuurwärk ufbaut.^[1] S Üssere orientiert sich an dr Gotik vo dütscher Bräägig, wäärend mä im Innere d Iiflüss vom Wiesbadener Programm dütlig cha gsee.^[2] D Dachflechene, wo uffellig grooss si, si mit Ardenneschiefer abdeckt.

2001 isch mä mit ere umfassende Usserenovazion fertig worde.