D Maischterschaft vu Züri, au Züri-Metzgete gnännt, isch e Aidagränne im Radsport, wu z Züri in dr Schwyz stattgfunde het. Friejer isch s aafangs Mai, bis 2004 derno im Augschte durgfiert wore, ab 2005 wäg dr Umstellig vum Rännkaländer vu dr UCI aafangs Oktober. Bis 2004 isch s Dail vum Rad-Wältcup gsii, wu zeh Ränne derzue ghert hän, 2005 un 2006 het s derno zue dr nei yygfierte UCI ProTour ghert. S Radränne isch syter anne 1910 regelmäßig durgfiert wore, anne 2006 zum 93. Mol. Dr gängig Name Züri-Metzgete chunnt vu dr schwäre Uufäll, wu s in dr Aafangszyt als gee het.
Im April 2007 isch bekannt wore, ass d Organisatore no dr widerholte Doping-Skandal im Radsport nimi gnue Sponsore hän chenne gwinne go d Cheschte vu 1,2 Millione Schwyzer Franke abzdecke, wäge däm isch s Ränne 2007 abgsait wore. Ab 2008 isch s as Amateur- un Volksränne durgfiert wore un het syterhär EKZ Züri Metzgete bzw. EKZ Volksmetzgete ghaiße. Am 5. Septämber 2010 het s Ränne unter em Motto "100 Jahre Züri-Metzgete" stattgfunde. Syt d Uusgab 2015 abgsait woren isch, isch s frogli, eb des Traditionsränne iberhaupt nomol veraastaltet wird.
Rekordsiger isch dr Schwyzer Heiri Suter, wu d Metzgete zwische 1919 un 1929 segs Mol gwunne het.
Streckefierig
Langi Zyt isch d Züri-Metzgete e Rundränne gsi, wu vu Züri uus e Boge dur s Zürcher Oberland un s Unterland gmacht gha het. Zuesatzrundine hän an eme gääche Stich e baar Mol uf Rägeschbärg uffegfiert. S Ziil isch bim Hallestadion z Oerlike gsii.
Vu 1993 bis 1998 isch s Ränne vu Basel uf Züri gange, unter em Namme Grand Prix Suisse. E baar Biel mit zum Dail gääche Aastiig hän vor allem s Änd vum Ränne sotte inträssant gstalte. Ziil isch di uffig Radrtännbahn näb em Hallestadion gsii.
Ab 1999 isch d Züri-Metzgete wider as Rundkurs durgfiert wore, mit aire Rundi vu 72,5 km un vier Rundine à 42,1 km am rächte Züriseestade un iber dr Pfannestil, mit eme Hecheunterschid vu 230 Meter zwisch em diefschte un em hegschte Punkt. Mit isngsamt 3318 Hechemeter, wu d Fahrer absolviere mien, un dr mehrfache Passage am Utoquai z Züri mache d Maischterschaft vu Züri zue aim vu dr aaspruchsvollschte Ränne vu dr ProTour. Syt em Neiaafang anne 2008 wird d EKZ Züri Metzgete mit Start/Ziil in Buchs/ZH uf eme 49 km lange Parcours im Zürcher Unterland uusdrait, S Amateurränne goht iber drei Rundine, d Volksmetzgete iber zwoo.
Schwiz
Henri Rheinwald
.svg){kind=small}
