Scottish National Party

D SNP isch anne 1934 entstanden us dr Fusion vu dr „National Party of Scotland“ un dr „Scottish Party“. Dr erscht Barlemäntssitz het d Bartei 1945 bi re Noowahl gwunne, dr Kandidat het si aber us Brinzip gwaigeret, dr s Madat z ibernee, drei Monet speter isch dr Sitz derno wider verlore gange. Dr negscht Erfolg isch dr Siig vu dr SNP-Kandidati Winnie Ewing bi dr Noowahl im schottische Wahlkrais Hamilton am 2. Novämber 1967 gsii. Ihre erschte Hegschtpunkt het d SNP in dr 1970er gha: Unter em Slogan It’s Scotland’s oil het fir si dr Aaspruch vu Schottland uf s nei gfunde Nordseeel gstellt – s Land chennt si no dr SNP vun eme subventionsabhängige Biet zue aim vu dr rychschte Länder vu Europa entwickle. Dr Slogan isch seli erfolgrych gsii: in dr Johr derno het si dr Stimmenaadail vu dr SNP vervierfacht. Bi dr Unterhuuswahlen im Oktober 1974 het si mit iber 800.000 Stimmen iber e Drittel vu allne schottische Stimmen iberchuu un het elf Barlemäntatirer chennen uf London schicke. In däne Johr isch dr ideologisch Standpunkt vu dr SNP nonig gfeschtigt gsii. Dr bolitisch un ideologisch Hauptgegner z Schottland, wu allno stark vu Induschtryarbaiter bregt sgii isch, isch d Scottish Labour Party gsii. In dr SNP het si Ändi 1970er Johr d 79 Group formiert, wu d Bartei wyter links uuse wie di sozialistisch Bartei het welle blatziere. Zue dr Verdrätter vu dr 79 Group het au dr speter First Minister un SNP-Vorsitzer Alex Salmond ghert. As barteiintärni Gegestremig isch unter dr Feirig vu dr Winnie Ewing d Campaign for Nationalism in Scotland grindet wore, wu as Hauptziil d Unabhängigkait vu Schottland ghaa het, unabhängig vu draditionällen ideologische rächts/links-Schemata. No dr Wahl vum Gordon Wilson zum Barteifierer vu dr SNP 1982 hän si die barteiintärne Fraktionen uf Druck vu obe wider ufglest.

Aini vu dr Hauptforderige vu dr SNP näbe dr Unabhängigkait vu Schottland isch au d Wideryyfierig vum Schottische Barlemänt gsii. Die Forderig isch anne 1999 erfillt wore.

Am 16. Mai 2007 isch dr Alex Salmond zum schottische Minischterbresidänt („Erschte Minischter“) gwehlt wore, as Noofolger vum Labou-Bolitiker Jack McConnell. Dr Salmond het zämme mit dr Scottish Green Party e Minderhaitsregierig bildet, wel di Liberale kai Koalition mit dr SNP hän wellen yygoo. Bi dr schottische Barlemäntswahl 2011 het d SNP di absolut Meehait im Barlemänt iberchuu mit 69 vu dr 129 Sitz. S Referändum iber d Unabhängikait vu Schottland, wu d Bartei im Wahl aagchindet het, het am 18. Septämber 2014 stattgfunde, d Meehait het si aber gege ne Abspaltig vum Verainigte Chenigrych uusgsproche. Dr Alex Salmond isch derno as First Minister un Vorsitzer vu dr SNP zruggdrätte, sy Noofolgeri isch d Nicola Sturgeon wore.

• 1934–1936 Alexander MacEwan
• 1936–1940 Andrew Dewar Gibb
• 1940–1942 William Power
• 1942–1945 Douglas Young
• 1945–1947 Bruce Watson
• 1947–1956 Robert McIntyre
• 1956–1960 James Halliday
• 1960–1969 Arthur Donaldson
• 1969–1979 William Wolfe
• 1979–1990 Gordon Wilson
• 1990–2000 Alex Salmond
• 2000–2004 John Swinney
• 2004–2014 Alex Salmond
• 2014-hite Nicola Sturgeon

Unterhuuswahle

Europwahle

Schottischi Barlemäntswahle

• Claire Sutherland: Neo-nationalist ideology: a discourse theoretical approach to the SNP and the CSU. PhD thesis. University of Edinburgh, 2002

• Offiziälli Homepage
• schottisch Bolitik un Wahlergebnis
• Europäischi Freii Allianz
• Di Griene/Europäischi Freii Allianz (Fraktion im Europäische Barlemänt)
• Wahlprogramm vu dr SNP 2007