Foru de les Islles del Pacíficu

El Foru de les Islles del Pacíficu (Pacific Islands Forum, PIF) ye una organización intergubernamental creada col oxetivu de potenciar la cooperación ente los países y territorios del océanu Pacíficu. Fundáu en 1971 como Fórum del Pacíficu Sur (South Pacific Forum, SPF), camudó'l so nome en 1999 pa qu'esti fora más inclusivu dempués de que munchos territorios de los dos hemisferios s'integraran nelli. El Foru tien estatus d'observador na Asamblea Xeneral de les Naciones Xuníes.

Foru de les Islles del Pacíficu
organismu internacional y organización internacional
Llocalización
Sede	Suva
Historia
Fundación	1971
Web oficial

La misión del Foru ye «trabayar, n'apoyu de los gobiernos de los miembros del Foru, p'ameyorar el bienestar social y económicu de los pueblos del Pacíficu Sur mediante la cooperación ente gobiernos y ente axencies internacionales, y representar los intereses de los miembros del Foru na forma alcordada por ellos». Les sos decisiones llévelas a la práctica'l Secretariáu (Pacific Islands Forum Secretariat, PIFS), un muérganu institucional desarrolláu a partir de la Axencia del Pacíficu Sur pa la Cooperación Económica (South Pacific Bureau for Economic Co-operation, SPEC). Amás del so papel como harmonizador de les posiciones rexonales en cuestiones polítiques, el Secretariáu desarrolla programes técnicos de desarrollu económicu, tresporte y comerciu.

Australia y Nueva Zelanda son muncho mayores y más ricos que los demás estaos miembros del Foru; Australia tien el doble de población que los otros 17 estaos miembros xuntos, y una economía cinco veces mayor. Por ello son los principales donantes de fondos, y importantes mercaos pa les esportaciones de los otros estaos insulares. Soldaos y policíes de los estaos miembros, principalmente Australia y Nueva Zelanda, conxuntamente con personal civil, tomaron parte nos caberos años n'operaciones de pacificación y estabilización en dalgunos estaos miembros, como les Islles Salomón (dende 2003) y Nauru (2004-2009), por mandatu del Foru. Esta capacidá d'intervención ta avalada pola Declaración de Biketawa, aprobada na 31ª cumbre de xefes d'estáu del Foru, celebrada en Kiribati n'ochobre de 2000. La 50ª cumbre del Foru celebrose en Tuvalu n'agostu de 2019.