Canadá
El Canadá[23] ye un país de la fastera septentrional d'América del Norte. Les sos diez provincies y trés territorios estiéndense dende l'océanu Atlánticu al Pacíficu, y pel norte hasta l'océanu Glacial Árticu, y tienen una estensión de 9,98 millones de km², que convierten al Canadá nel segundu país más grande del mundu. La so frontera meridional colos Estaos Xuníos, amás, ye la frontera binacional más llarga del mundu. La mayoría del país tien un clima frío o mui frío n'iviernu, pero la fastera más meridional tien branos templaos. Canadá ta poco pobláu, y la mayoría'l so territoriu ta ocupáu por viesques y tundra, amás de pola cordelera de los Montes Rocosos. Ta perurbanizáu: el 82% de los sos 35,15 millones d'habitantes concéntrense en ciudaes de gran y medianu tamañu, les más d'elles cerca de la so frontera meridional. La so capital ye Ottawa, y les trés mayores aglomeraciones de población son les ciudaes de Toronto, Montreal y Vancouver.
Varies poblaciones indíxenes habitaron l'actual Canadá por miles d'años primero de qu'aportaran los europeos. Los primeros d'estos foron los británicos y franceses, qu'establecieron colonies dende'l sieglu XVI; la primera foi la colonia de Canadá, fundada por Francia en 1535. Como resultáu de dellos conflictos armaos, la Norteamérica británica ganó y perdió territorios hasta que, a finales del sieglu XVIII, controlaba la mayoría del actual territoriu canadiense. El 1 de xunetu de 1867 les colonies de Canadá, Nueva Brunswick y Nueva Escocia federáronse pa formar un dominiu federal semiautónomu que recibió'l nome de Canadá. De magar entamó un proceso d'adición de territorios y provincies al dominiu hasta llegar a los actuales. Canadá algamó la independencia gradualmente, nún procesu qu'entamó col nomáu gobiernu responsable na década de 1830 y que finó cola patriación de la Constitución en 1982. Sicasí, dende 1931, cola promulgación del Estatutu de Westminster, Canadá yera un país práuticamente independiente, una y bones l'únicu poder que nun tenía yera'l de poder enmendar la so propia constitución.
Canadá ye una democracia parllamentaria federal y una monarquía constitucional, cola reina Sabela II d'Inglaterra como xefa d'estáu. El país, que ye oficialmente billingüe a nivel federal, ye, como resultáu de la inmigración a gran escala de munchos otros países, una de les naciones más multiculturales y con mayor diversidá étnica del mundu. Su economía ye la décima mayor del mundu, y básase na esplotación de los sos bayurosos recursos naturales y de la so importante actividá comercial. La llarga y complexa rellación ente Canadá y el so vecín del sur, Estaos Xuníos, tuvo a lo llargo de tola so historia un impautu importante na so economía y cultura.
Canadá ye un país desarrolláu qu'ocupa'l décimu llugar nel ránking del Índiz de Desarrollu Humanu, y la de so ye la decimoquinta renta per capita mayor del mundu. Ocupa los primeros llugares del mundu no que cinca a tresparencia gubernamental, llibertaes civiles, calidá de vida, llibertá económica y educación. Pertenez a la Commonwealth y a la Organización Internacional de la Francofonía, y tamién a bien d'instituciones internacionales ya intergubernamentales como les Naciones Xuníes, la Organización del Tratáu del Atlánticu Norte, el G-7, el Grupu de los Diez, el G20, el Tratáu de Llibre Comerciu d'América del Norte y el Foru de Cooperación Económica Asia-Pacíficu.
Historia
Política
Canadá tien un gobiernu parllamentariu con fuertes tradiciones democrátiques. El parllamentu ye compuesto por La Corona, una Cámara de los Comunes electa pol pueblu y un Senáu designado. Cada miembru del parllamentu na Cámara de los Comunes ye escoyíu por mayoría simple nun distrito eleutoral o so equivalente. El primer ministru ye que convoca a eleiciones xenerales, las cuales deben de ser máximu cinco años dempués de la eleición anterior, o pueden ser desencadenar pol gobiernu al pidir la moción de censura nel parllamentu.[25] El país ye una monarquía parllamentaria. El xefe d'Estáu ye la reina d'Inglaterra, representada por un gobernador-xeneral. El xefe de gobiernu ye'l primer ministru.
Organización territorial
Canadá ye una federación compuesta por diez provincies y trés territorios. Les primeres tienen más autonomía que los segundos, faéndose cargu de la educación, la sanidá y el bienestar[26]. Ente toes recauden en conxuntu más impuestos que'l propiu gobiernu federal, lo que fai del sistema canadiense un modelu singular nel mundu. Col so presupuestu el gobiernu federal puede iniciar polítiques nacionales en provincies concretes, y magar que les provincies pueden renunciar a recibir esos fondos y programes, fánelo mui de ralo en ralo. El gobiernu federal, amás, tien un fondu p'aportar dineru a les provincies más probes col envís d'igualar na midida de lo posible la cantidá y calidá de los servicios que presten toes elles a los ciudadanos[27].
Provincies
- Alberta
- Columbia Británica
- Ontario
- Québec
- Manitoba
- Nueva Brunswick
- Terranova y Llabrador
- Nueva Escocia
- Islla del Príncipe Dubardu
Territorios
Ciudaes
Economía
Demografía
La población del país ye, según el censu canadiense de 2016, de 35.151.728 habitantes, lo que representa un aumentu del 5% respectu al del 2011[28][29]. Ente 2011 y mayu del 2016 la población del país medró en 1,7 millones d'habitantes; dos terceres partes d'ellos yeren inmigrantes[30]. Ente 1990 y 2008 la población medró en 5,6 millones, que representen un 20,4% del total de la so población[31]. Los causantes d'esta medría son, en primer llugar, la inmigración, y tamién, magar qu'en menor midida, el crecimientu natural[32].
Canadá tien una de les mayores tases d'inmigración per capita del mundu[33], de resultes tantu d'una política económica consciente como de los efectos de la rexunificación familiar de los inmigrantes previamente asentaos nel país[34][35]. Sicasí, esto nun ye tan problemáticu como notros países: la población del país, y tamién tolos partíos políticos más importantes, sofiten l'actual política migratoria[34][36]. Un total de 341.180 persones aportaron al país en 2019, principalmente dende Asia[37]: India, Filipines y China son los trés países de los que proceden un mayor númberu d'inmigrantes a Canadá[38]. Los recién llegaos asiéntense principalmente nes mayores árees urbanes del país, les de Toronto, Montreal y Vancouver[39]. Canadá tamién acepta una gran cantidá de refuxaos: más del 10% de los refuxaos que son acoyíos notros países a nivel mundial sonlo en Canadá, que recibió a más de 28.000 d'ellos en 2018[40][41].
La densidá de población de Canadá, de 3,7 habitantes per km², ye una de les menores del mundu[42]. Canadá estiéndese latitudinalmente ente los paralelos 83 N y 41 N, y alredor del 95% de los sos habitantes viven al sur del paralelu 55 N[43]. Cuatru quintos de la so población, amás, viven a 150 km o menos de la llende del país colos Estaos Xuníos[44]. La fastera más densamente poblada del país yel Corredor Québec-Windsor: estiéndese pola fastera meridional de les provincies de Québec y Ontario a la vera de los Grandes Llagos y el ríu San Llorienzu, y nelli vive casi la metá de la población total del país[43]. Otru 30% vive na rexón de Lower Mainland, na Columbia Británica, y nel Corredor Calgary-Edmonton, na provincia d'Alberta[45].
| CMA | Provincia | Población | CMA | Provincia | Población | |
|---|---|---|---|---|---|---|
| Toronto | Ontario | 5.928.040 | London | Ontario | 494.069 | |
| Montreal | Québec | 4.098.927 | St. Catharines–Niagara | Ontario | 406.074 | |
| Vancouver | Columbia Británica | 2.463.431 | Halifax | Nueva Escocia | 403.390 | |
| Calgary | Alberta | 1.392.609 | Oshawa | Ontario | 379.848 | |
| Ottawa-Gatineau | Ontario-Québec | 1.323.783 | Victoria | Columbia Británica | 367.770 | |
| Edmonton | Alberta | 1.321.426 | Windsor | Ontario | 329.144 | |
| Québec | Québec | 800.296 | Saskatoon | Saskatchewan | 295.095 | |
| Winnipeg | Manitoba | 778.489 | Regina | Saskatchewan | 236.481 | |
| Hamilton | Ontario | 747.545 | Sherbrooke | Québec | 212.105 | |
| Kitchener– Cambridge–Waterloo | Ontario | 523.894 | St. John's | Terranova y Labrador | 205.955 |
Cultura
Referencies
Wikimedia Commons tien conteníu multimedia tocante a Canadá.
| Países d'América |
| Antigua y Barbuda | Arxentina | Les Bahames | Barbados | Belize | Bolivia | Brasil | Canadá | Chile | Colombia | Costa Rica | Cuba | Dominica | República Dominicana | Ecuador | Estaos Xuníos d'América | Granada | Guatemala | Guyana | Haití | Hondures | Méxicu | Nicaragua | Panamá | Paraguái | Perú | El Salvador | Saint Kitts y Nevis | Santa Llucía | San Vicente y Les Granadines | Surinam | Trinidá y Tobagu | Uruguái | Venezuela | Xamaica Dependencies: Anguila | Les Bermudes | Islles Caimán | Clipperton | Guadalupe | Guyana Francesa | Groenlandia | Islles Malvines | Islles Turques y Caicos | Montserrat | Martinica | Puertu Ricu | Shag Rocks | Xeorxa del Sur y Sandwich del Sur |
