R Doradus
R Doradus (P Doradus / HD 29712 / HR 1492 / HIP 21479)[9] ye una estrella variable na constelación austral de Doráu, cerca de la llende cola constelación de Reticulum.Alcuéntrase a 193 años lluz de distancia del Sistema Solar.[10]
Carauterístiques
R Doradus ye una xigante colorada de tipu espectral M8IIIe.[9]Con un diámetru angular de 0,057 ± 0,005 segundos d'arcu,[11] ye la estrella —con esceición del Sol— con un mayor diámetru aparente vista dende la Tierra.[12]En concretu, ye más d'un 30% mayor que Betelgeuse (α Orionis), qu'antes ostentaba'l títulu d'estrella con mayor tamañu aparente. El so radiu ye 370 vegaes más grande que'l radiu solar; si tuviera asitiada nel centru del Sistema Solar, la órbita de Marte quedaría englobada dientro de la mesma estrella. Anque la so masa ye similar a la del Sol, la so lluminosidá total ye 6500 ± 1400 vegaes mayor que la lluminosidá solar.Al igual qu'otres estrelles asemeyaes, R Doradus pierde masa estelar, a razón de 2,7 × 10-7 mases solares cada añu.[13]
Rellumu y variabilidá
La magnitú visual de R Doradus bazcuya ente +4,8 y +6,6 nun ciclu de 338 díes,[14] pero ye na rexón del infrarroxu onde R Doradus ye una de les estrelles más brilloses del cielu.En banda J —ventana nel infrarroxu cercanu centrada a 1,25 μm— ye, con magnitú -2,65, la segunda estrella más brillosa dempués de Betelgeuse (α Orionis).[15]Magar ta catalogada como variable semirregular de tipu SRB, tópase estrechamente rellacionada coles variables Mira.[16]
