Niedaöstareich

Niedaestareich is mit 19.186,27 km² des flächnmäßig gresste Bundeslaund vo Estareich. Es is laundschoftlich in Viadln eitäut:

Neadli vo da Donau: Woidviadl (Viadl oban Manhartsbeag) Weiviadl (Viadl untan Manhartsbeag). Sidli vo da Donau: Mostviadl (Viadl oban Weanawoid) Industrieviadl (Viadl untan Weanawoid)

De Viadln haum, geografisch gsegn, a voikommen untaschiedliche Struktua. Währends im Mostviadl de Auslaifa vo de Koichoipen mit Beag um de 2000 m gibt, is des Woidviadl hauptsächli a Granitplateau. Im Noadostn liegts higelige Weiviadl, des wos ins floche Moachfööd ohfoit und sidlich vo da Donau is des Weana Beckn.

Niedaestareich grenzt auf ana Läng vo 414 km aun de Nochbalända Tschechei und Slowakei, und is des Bundesland mit da zweitlängstn Außngrenz.

Trennt wean de Viadln in westestlicha Richtung vo da Donau, in Noad-Sid-Richtung vom Manhartsbeag und im Weanawoid vo da Thermenlinie.

Beag

• Schneebeag (Klosterwoppm; 2.076 m)
• Rax (Scheibwoidhechn; 1.943 m; hexte Eahebung: Heikuppn; 2.007 m – Steiamoak)
• Ötscha (1.893 m)
• Dirrnstaa (1.878 m)
• Hochkoa (1.808 m)
• Hochwexl (1.743 m)
• Hoche Waund (Plockles 1.132m)
• Dirre Waund (Kotharianenschlog 1.222 m )
• Großa Päustaa (1.061 m)
• Hocheck (1.036 m)
• Nöwistoa (1.017 m)
• Eibl (1.007 m)
• Sundaberg (704 m)

Oipm-Iwagäng

• Semmaring (985 m)
• Wexl (980 m)

Fliss

Niedaestareich wiad fost äussa gaunzes iwa de Donau entwassat. Da anzige Fluss, der sein Obfluss iwa de Moidau und de Elbe in de Noadsee hod, is de Lainsitz im Woidviadl.

De wichtigstn Fliss neadli vo da Donau san da Kaump, de Krems, de Lainsitz, de Moach und de Thaya. Sidli vo da Donau sans de Enns, de Ybbs, da Ealauf, de Möck, de Traasn, de Schwechat, de Fischa, de Schwoaza, de Triesting, de Leitha und de Piaschting.

Seen

• Stausee Ottenstaa (4,3 km²)
• Lunza See (0,69 km²)
• Ealaufsee (etwa zua Höftn in Niedaestareich gleng; 0,56 km²)

Flächnvatäulung

Natuaschutz

Im Natuaschutz gibts vaschiedane Schutzstufn mit untaschiedlichn Prioritätn.

De Schutzstufn san:

• Landschoftsschutzgebiet: 39 Landschoftsschutzgebiet (22% vo da Gsaumtflächn); im Vagleich zan Naturschutzgebiet san Landschoftsschutzgebiet großflächiga, Auflogn und Nutzungseinschränkungen owa geringa.
• Nationäupark: Niedaestareich is des anzige Bundesland mit zwaa Nationäuparks, Thayatoi und Donau-Aun
• Natuapark: 23 Natuaparks mit rund 500 km² vo da Landesflächn
• Natuaschutzgebiet: 68 Natuaschutzgebiet mit ana Flächn vo 133 km²

Höin

In Niedaestareich gibts ziemlich vü Natuahöin, insgsaumt san 4082 katastamäßig eafosst. Die meistn Höin in Niedaöstrreich haum si in de Koik- und Dolomitstana va de Koikoipn büdt und san deshoib sognaunnte Karsthöin. A da Koikmarmoa in de Zentraloipn und in da Behmischn Mossn ermeglicht de Entstehung vo Höin. Zu de gräßtn Höin vo Niedaestareich ghean:

• de Ötschahöin im Ötscha, 27.003 Meta laung, a Zusaummenschluss vo Taubnloch und Gödloch
• des Pfaunnloch im Ötscha, 5.287 Meta laung
• de Lechnerweidhöin im Dianstaa, 5.252 Meta laung
• des Trockane Loch in Schwoaznboch an da Pielach, 4.510 Meta laung
• de Herrmannshöin in Kiachbeag aum Wexl, 4.430 Meta laung
• de Eisnstaahöin in Bod Fischau, 2.341 Meta laung

Niedaestareich is des Kernlaund vo Estareich. Fria hods nua aafoch Estareich ghassn (speda: unta da Enns) und hod da Dynastie Habsburg bzw. Habsburg-Lothringen („Haus Estareich“) und in jewäuligen Gsaumtstoot in Naum gem.

Aus dem Grund is de Gschicht vo Niedaestareich mit da Gschicht vo Estareich meah oda weniga identisch.

De Bevökarung nimmt in de zenträun Gebietn im Umlaund vo Wean laufend zua, täuweis duach Zuazug ausn städtischn Bereich, owa a duach Zuazug aus de periphean Gebiete, zum Beispü ausn Woidviadl oder aus de Raundgebiet vom Weiviadl, de täuweis aa Problemgebiet aum Oawadsmoakt san. Seit St. Pödn de Laundeshauptstod is, is a duatn a steakare Zuawaundarung festzumstöön. Wäu in sensible Gebiete wiar im Weanawoid duachn Zuazug de Gfoah vo ana Zasiedlung gem is, wean laufend restriktivare Moßnauhman in da Raumoadnungspolitik festglegt.

Da Ausländaauntäu is, gmessn aun gaunz Estareich, mit 6,3 % untaduachschnittlich.

Religion

Im Joah 2001 woan 79,3 % vo de Bewohna remisch-katholisch, 3,3 % protestantisch mit 60 Kiachn in 27 Pfoan, 3,2 % islamisch und 10,8 % konfessionslos.

1918–1934 woa Niedaestareich zeascht in via Woikraas auftäut. Da Laundtog hod aus 60 Ohg'oadnatn bestaundn. 1932 haum de letztn demokratischn Woin vua da NS-Zeit stottgfundn: Es san ocht Woikraas büdt wuan und de Zoih vo de Ohg'oadnatn is auf 56 varringat wuan. So hod ma vasuacht, de domolign Großpartein auf Kosten von da imma steaka weadanden NSDAP zum steakn.

1934–1938 is des Laund ständestootlich regiat wuan, 1938–1945 is a Reichsstotthoida (Gauleita) an da Spitzn vo da Laundesvawoitung und vo da NSDAP im Laund gstaundn.

Seit 1945 wiad de Laundespolitik vo da ÖVP dominiat, de wos seit domois aa in Laundeshauptmann stöd. De Buagamaasta ghean aa meaheitlich da ÖVP aun. De SPÖ is de zweitsteakste Kroft im Laund.

Seit 2013 san im niedaestareichischn Laundtog fimf Patein vatretn:

• ÖVP mit 30 Sitz
• SPÖ mit 13 Sitz
• Team Stronach mit 5 Sitz
• FPÖ mit 6 Sitz
• De Greanan mit 4 Sitz

(Staund: 2013)

De Laundesregiarung setzt si zaum ausn Laundeshauptmau, seine zwaa Stöövatreta und sechs Regiarungsmitglieda, de Laundesrät gnaunt wean. De Patein entsendn de Mitglieda vo da Laundesregiarung nochn Vahötnis vo de eareichtn Wöhlastimman. Daher san - obwoi de ÖVP mit absoluta Meaheit regiat - a SPÖ-Mitglieda in da Laundesregiarung vatretn.

Inan Bundesrot entsendt des Bundeslaund 12 Mandatare; davo ghean siebane der ÖVP, drei da SPÖ, ans da FPÖ und ans denan Greanan.

Im Nationäurot ist de ÖVP mit 11, de SPÖ mit 10, de FPÖ mit 6, is BZÖ und de Greanan mit je 2 Mandatare vatretn (Staund 2005).

Niedaestareich is in 21 Vawoitungsbeziak' und 4 Statutoastädt' gliadat. Seit da letztn Gemeinderefuam vo 1970 und a poa klaanan Ändarungen gibts 573 Gmoana.

Noch ana Ohstimmung is 1986 St. Pödn de Laundeshauptstod wuan. Da Umzug vo da Laundesregiarung und vo da Vawoitung hod bis 1996 dauat, bis duathin woa da Sitz im Laundhaus in da Herrngossn in Wean im easchtn Beziak.

Zua gleichn Zeid mit da Iwasiedlung vo da Lanudesregiarung nach St. Pödn is aa a Vawoitungsrefuam eigleit wuan, de ar a Dezenträulisiarung vo de Beheadn bedeit hod und mid dea ma de anzlnan Vawoitungsstöön näha an de anzlnan Beziakshauptmaunnschoftn augsiedlt hod.

Hauptregionen

De niedaestareichische Landesplanung hod aus operativen Grindn des Laundesgebiet in fümf Aktionsraime vo de regionäun Entwicklungsvabänd bzw. vo de zuaghearign Regionalmanagements untatäut:

• Industrieviadl
• Mostviadl
• NÖ-Mittn (St. Pödn, Krems und Lilienföd)^[1]
• Weiviadl
• Woidviadl

Die sognauntn Hauptregionan fossn Gebiete zaum, de wos gemeinsaume Meakmoi (geografische Lagebeziehungen, ähnliche Wirtschaftsstruktur, Ressourcenausstattung) oda ähnliche Probleme haum. Hauptaufgob is, de Aunliegn vo de Regionan zum artikulian, entwicklungsstrategisch wichtige Themenschwaapunkte zum formulian und passende Leitprojekte zum inizian.

Statutarstädt

Des san Gmoana, de wos ned nua des Stodrecht haum, sundan aa kaana Beziakshauptmaunschoft untastöd san und si in eahnan eigan Stodaumt (Magistrat) söba vawoitn.

Beziak'

De wiatschoftlich stärkstn Regionen im Laund liegn entlaung vo da Thermenlinie. De stärkste Wiatschoftskroft haum de Gebiete um Wean, mit da Entfeanung vo Wean sinkts daun in da Regl. Da Beziak Mödling, in da Nähe vo Wean, hod des hechste Steiaaufkumman.

Nochm Zweitn Wödkriag is des Laund in da sowjetischn Besotzungszone glegn, wos a Nochtäu fia de wiatschoftliche Entwicklung woa. De Zastearung vo Großbetriebm, Demontagen und Reparationen (Eadöö vom Marchföd) haum si negativ ausgwiakt. Eascht nochn Obschluss vom Stootsvatrog 1955 hod in Niedaestareich da wiatschoftliche Wiedaaufbau augfaungt. Owa bis 1989 hod da Eisane Vuahaung de Gschicht no ollawäu bremst. So gibts bis heit no an großn Strom vo Toges- und Wochenendpendla zu eahnare Oawadsplätz in Wean.

• Viakanthof

• Karl Gutkas: Geschichte Niederösterreichs. Valog: Böhlau, Wean 1984

 Commons: Niedaösterreich – Oibum mit Buidl, Videos und Audiodateien

• Haamseitn vo da Niedaösterreichischen Laundesregiarung
• „Niederösterreich – Hinein ins Leben.“ (offiziös Tourismus- und Kuituaportal)