Natural gas

An natural gas (inaapod man na fossil gas; minsan gas sana) iyo sarong natural na pigsaralak-salak na hidrokarburo na gas na pangenot na pigbibilog nin metano, pero harus igwa man nin baryenteng bilang nin iba pang mga halangkaw na alkane, asin minsan dikit na porsyento nin karbon dioksido, nitroheno, hidrohenong sulpido, o elyo.[2] Naporma ini kan an mga libel nin nalapang tinanom asin hayop na materya na iyo napasairarom sa labing init asin presyon sa irarom kan kadagaan sa laog nin milyong taon.[3] An orihinal na enerhiya na naguno kan mga tinanom hale sa Saldang iyo pigtatago sa porma nin mga sugpong kimikal sa gas.[4] An natural gas iyo sarong fossil fuel.

An pankinabang pagbenta nin natural gas kaidtong 2013. An mga numero iyo yaon sa bilyong kubikong metro kada taon[1]
An ekstraksyon nin natural gas kan kada nasyun sa kubikong metro kada taon kaidtong 2013.

Dae nababagong hidrokarburo an natural gas na ginagamit sa pag-init, pagluto, asin paghimo nin kuryente.[4] Ginagamit man ini bilang panggatong sa mga behikulo asin bilang kimikal na materyales sa paggibo nin mga plastik asin iba pang importanteng organikong kimikal sa komersyo.

An ekstraksyon asin pagkonsumo nin natural na gas iyo sarong mayor asin nagpapa-urog sa pagbabago nin klima.[5][6][7] Potensyal ini na greenhouse gas kapag linuwas sa atmospera, asin naghihimo nin karbon dioksido kapag sinulo.[8][9] An natural gas pwedeng suluon para makagibo nin init asin kuryente; na nagluluwas nin mas kadikit na ati asin lason sa punto nin paggamit na relatibo sa ibang fossil asin biyomas na panggatong.[10] Alagad, an gas venting asin flaring, kaiba an mga dae pigtutuyong pugitibong emisyon sa kahiwasan nin suplay na kadena, iyo pwedeng magresulta sa similar na pankagabsang carbon footprint.[11][12][13]

An natural gas iyo nahahanap sa irarom kan kadagaan o naka-asosyar sa iba pang hidrokarburong gunuan sa coal beds asin bilang methane clathrates. An petrolyo iyo saro man na fossil fuel na nahihiling harani sa natural gas. Kadaklan sa mga natural gas iyo namomokna sa haloy nin panahon sa paagi nin duwang mekanismo: biyoheniko asin termoheniko. An biyohenikong gas iyo namokna nin mga metanohenikong organismo sa mga marshes, bogs, landfills, asin hababaw na sedimento. Sa kairaroman kan Kinaban, sa halangkawon na temperatura asin presyon, an termohenikong gas iyo namomokna sa nasulong organikong materyal.[14][3]

Sa produksyon kan petrolyo, an gas iyo minsan pigsusulo bilang flare gas. Bago an natural gas pwedeng gamiton bilang panggatong, kadaklan, pero dae gabos, iyo dapat maproseso para mahali an mga impuridad, kaiba an tubig, para makua an ispesipikasyon kan nabebentang natural gas. An mga lain na produkto sa pagprosesong ini iyo kabali an mga etano, propano, butano, pentano, mga hidrokarburo na may halangkaw na molekular na gabat, hidrohenong sulpido (na pwedeng maliwat sa purong asupre), karbon dioksido, tubig-sangaw, asin minsan elyo sagkod nitroheno.

An natural gas iyo minsan simple asin dae-pormal na inaapod bilang "gas", urog na kun pigkokompara sa iba pang gunuan nin enerhiya, arug kan lana o coal. Alagad, dae dapat maribong sa gasolina, na harus pigpapalipot man sa terminong "gas", urog na sa Norteng Amerika.

Hilingon man

Mga panluwas na takod

Toltolan