Aviñón

Aviñón foi residencia dos papas entre 1309 e 1377, cando a cidade atopábase baixo o goberno dos reis de Sicilia pertencentes á Casa de Anjou. En 1348, o papa Clemente VI comprou unha residencia á raíña Xoana I de Sicilia. Ese período, no que residiron na cidade os papas Clemente V, Xoán XXII, Bieito XII, Clemente VI, Inocencio VI, Urbano V e Gregorio XI, é coñecido como Papado de Aviñón. Despois dese período, en 1378, produciuse o Gran Cisma de Occidente que non se resolveu ata 1417.

Os antipapas Clemente VII e Bieito XIII continuaron residindo na cidade aínda despois de que os papas regresasen a Roma en 1377. Clemente VII permaneceu en Aviñón durante todo o seu pontificado (1378-1394) mentres que Bieito XIII viviu en Aviñón ata que fuxiu cara a Aragón, fixando a súa residencia finalmente en Peníscola, onde morreu aos 96 anos en 1423.

Aviñón fora sede episcopal desde o ano 70 dC, e foi convertida en Arcebispado en 1476. Nel celebráronse varios sínodos de menor importancia. A súa universidade foi fundada polo papa Bonifacio VIII en 1303 e, debido á súa reputación polos seus estudos en leis, tivo grande importancia ata a Revolución francesa.

Está situada na marxe esquerda do río Ródano, no sueste do país. Está preto da costa, a 80 km ao noroeste de Marsella e a 650 km de París. O seu clima é mediterráneo, con invernos frescos e veráns cálidos.

Aviñón é unha vila de rico patrimonio protexido e o seu centro histórico foi declarado Patrimonio da Humanidade pola Unesco en 1995. Entre os seus lugares de interese destacan:

• Pazo dos Papas
• Conxunto episcopal
• Ponte de Aviñón
• Murallas
• Basílica de San Pedro
• Hôtel de Ville, casa do concello.

Ligazóns externas

• Páxina web de Aviñón Arquivado 02 de xuño de 2005 en Wayback Machine. (en francés)

Predecesor: Weimar

Capital Europea da cultura xunto con Praga Bergen Boloña Bruxelas Cracovia Helsinqui Reiquiavik Santiago de Compostela 2000

Sucesor: Rotterdam Porto