New Year's Day (երգ, Թեյլոր Սվիֆթ)
«New Year's Day», ամերիկյան երգչուհի, երգահան Թեյլոր Սվիֆթի երգը, որը ձայնագրվել է նրա վեցերորդ՝ «Reputation» (2017) ալբոմի համար։ 2017 թվականի նոյեմբերի 27-ին երգը ներկայացվել է ամերիկյան «Country Airplay» շքերթում՝ որպես ալբոմի չորրորդ սինգլ[1][2]։ Ջեկ Անտոնոֆի հետ միասին Սվիֆթը համահեղինակել և համատեղ ներկայացրել է երգը։
«New Year's Day (երգ, Թեյլոր Սվիֆթ)» | |
---|---|
Թեյլոր Սվիֆթի երգը | |
Լեզու | անգլերեն |
Լեյբլ | Big Machine Records |
Հեղինակ | Թեյլոր Սվիֆթ և Ջեկ Անտոնոֆ |
Պրոդյուսեր | Ջեկ Անտոնոֆ և Թեյլոր Սվիֆթ |
Պատմություն և թողարկում
«New Year's Day» երգը գրվել է Թեյլոր Սվիֆթի և Ջեկ Անտոնոֆի կողմից։ Երգի ստեղծման պատմությունն Անտոնոֆը նկարագրել է հետևյալ կերպ․
Երգը ստեղծվել է իմ տանը շատ արագ։ Մենք այն մեքենագրեցինք հաջորդ առավոտյան՝ համոզվելու համար, որ այն երազ չէ[3]։ |
Որպես ներշնչանքի աղբյուր՝ հանդես է եկել Նոր տարվա նախօրյակին նվիրված երեկույթը Սվիֆթի լոնդոնյան բնակարանում։ Խոսքերի մասին Սվիֆթն ասել է․
Ես մտածում էի՝ ինչպես են բոլորը խոսում և մտածում այն մասին, թե ում ես համբուրում կեսգիշերին [...] Բայց ես մտածում էի, որ կա ավելի ռոմանտիկ մի բան, թե ով է քեզ հետ դիմավորում Նոր տարին։ Ո՞վ քեզ դեղահաբ կտա և կմաքրի տունը։ Ես կարծում եմ, որ դա ավելի տևական է[4][5]։ |
«New Year's Day»-ը վերջին երգերից էր, որը հանդիսավոր կերպով ներկայացվել է նախքան «Reputation» ալբոմի թողարկումը։ Այն տեղի է ունեցել նոյեմբերի 9-ին[6]։ 2017 թվականի նոյեմբերի 27-ին երգը ներկայացվել է ամերիկյան «Country Airplay» շքերթում՝ որպես ալբոմի չորրորդ սինգլ[7]։
Քննադատական ընկալում
Երգը հիմնականում արժանացել է դրական արձագանքի։ Վուլտուրն ասել է․ «New Year's Day» երգը «Reputation» ալբոմի ամենալավ երգը չէ, բայց լավագույններից մեկն է, և մնացած լավ երգերի նման այն աչքի է ընկնում հատուկ զգացողությամբ, որն առաջ է տանում ալբոմը[8]։
Առևտրային ներկայացում
Երգը զբաղեցրել է «Hot Country Songs» շքերթի 40-րդ հորիզոնականը, այնուհետև բարձրացել մինչև 33-րդը։ Այն նաև զբաղեցրել է «Country Airplay» շքերթի 41-րդ հորիզոնականը։ Դա Սվիֆթի առաջին հայտնվելն էր այս շքերթներում՝ սկսած 2014 թվականին «Shake It Off» սինգլի թողարկումից[7]։ «Canadian Country chart» շքերթում երգը զբաղեցրել է 50-րդ հորիզոնականը։
Կենդանի ներկայացում
«New Year's Day» երգի ներկայացումը կենդանի հնչողությամբ ձայնագրվել է 2017 թվականի հոկտեմբերին՝ «Reputation» ալբոմի գաղտնի սեսիաներից մեկի ժամանակ Սվիֆթի՝ Ռոդ Այլենդի տանը[9]։ Նա նաև ներկայացրել է երգը «The Tonight Show Starring Jimmy Fallon»-ի մի դրվագում 2017 թվականի նոյեմբերի 13-ին[10][11]։ Երգը նաև «Reputation Stadium Tour» շրջագայության կանոնավոր մասն էր կազմում և «Long Live» երգի հետ միասին ներկայացվել է դաշնամուրով[12]։
Անձնակազմ
«Reputation» ալբոմի վրա աշխատել են․
- Թեյլոր Սվիֆթ - մենակատար, երգի հեղինակ, բեք-վոկալ, պրոդյուսեր
- Ջեկ Անտոնոֆ - պրոդյուսեր, ծրագրավորող, գործիքավորող, սինթեզավորող
- Լաուրա Սիսկ - ինժեներ
- Սերբան Գենեա - միքսող
- Ջոն Հեյնս - միքսող ինժեներ
- Ռենդի Մերիլ - համակարգող
Շքերթներ
Շքերթ (2017-18) | Զբաղեցրած հորիզոնական |
---|---|
Բելգիական (Ultratop)[13] | 33 |
Կանադական (Canadian Hot 100) (Billboard)[14] | 50 |
Ամերիկյան «Hot Country Songs» (Billboard)[15] | 33 |
Ամերիկյան «Country Airplay» (Billboard)[16] | 41 |
Թողարկման պատմություն
Մարզ | Ամսաթիվ | Ձևաչափ | Լեյբլ(ներ) | Աղբյուր |
---|---|---|---|---|
ԱՄՆ | 2017 թվականի նոյեմբերի 27 | Country radio | Big Machine Records | [2] |