S Ensemble Aventure, wu anne 1986 z Fryburg grindet wooren isch, zellt zue dr wiichtigschte europäischen Ensemble fir Neii Musik.
S Ensemble Aventure isch am 13. Jänner 1986 vum Wolfgang Rüdiger, em Walter Ifrim un em Johannes Nied grindet woore, wu si an dr Musikhoochschuel chännegleert ghaa hän. S Ensemble bstoot us fufzee profilierte Inschtrumentalischt*ine, wu in verschiidene Bsetzige mitenander Musik mache. Uf dr Kunzärtbrogramm steen Wäärch vu dr Zwoote Wiener Schuel, dr New York School un dr Darmstädter Schuel, Dada, Fluxus un Kunzäptchunscht un au Wäärch vu verdrängte un vergässene Kumpenischte. Fir d Bsetzig vu dr Kumpesizioon Octandre vum Edgar Varèse (siibe Bleeser un Kontrabass), wu s Ensembe im Debütkunzärt bresäntiert het, aber au fir vyl anderi Bsetzige het s Ensemble Aventure syterhäär e Hufe Kumpesizioonsufdreeg vergee;[1] insgsamt het s e baar hundert Uruffierige gspiilt.[2] Syt dr frieje 1990er Joor wird s Ensemble Aventure uf renommierti Feschtival un in wiichtigi Kunzärtzyylede yyglaade; Turnee hän unter anderem ins europeisch Uusland, uf Oschtaasie un au als uf Latynameerrika gfiert. E Fryburger Kunzärtzyylede mit in dr Reegle segs Saisonkunzärt git s syter anne 1991. 1995 het s Ensemble in dr Ryym vu dr Elisabeth-Schneider-Stiftig en feschte Oort fir die Kunzärtzyylede un au fir d Proobe gfunde.[3]
Näb dr Kunzärt het s Ensemple Aventure au e Hufe Yyspiilige fir dr Sidweschtrundfunk un anderi Rundfunkaastalte gmacht un derzue rund zwanzg CD-Ufname.[4]
Anne1995 het s Ensemble Aventure dr Regio-Musikbryys vu dr Europeische Wiirtschaft iiberchuu, 1996 un 1998 je ne Bryys vu dr dytsche Schallblattekritik, 1996 un 2011 je ne Feertderbhryys vu dr Ernst-von-Siemens-Musikstiftig un 2006 en Bryys vu dr Kulturstiftig vu dr Länder – fir e John-Cage-Projäkt, wu im Rame vu dr Eschinger Musikdääg zäme mit Schueler*ne bresäntiert wooren isch.[5]
D Fryburger Kultuur- un Veraaschtaltigszytig „Kultur Joker“ het s Ensemble Aventure eso karakterisiert:[6]
„Es hat Komponisten wiederentdeckt, die im Nationalsozialismus verfemt waren. Es sucht den Kontakt zur außereuropäischen Musik. Es möchte aufrütteln und emotional bewegen, möchte Stachel sein und auf keinen Fall langweilen.“
Dä Artikel basiert uff ere fräie Übersetzig vu dere Version vum Artikel „Ensemble_Aventure“ vu de dütsche Wikipedia. E Liste vu de Autore un Versione isch do z finde. |