Carlo Karges Uwe Fahrenkrog-Petersen Jürgen Dehmel Rolf Brendel
D Nena (* 24. März1960 z Hagen; eigendlich Gabriele Susanne Kerner) isch ä dütschi Musikeri. Si gilt als eini vo dr populärschte dütsche Sängerine uberhaupt.
Sit ihrem drittä Läbensjahr wird d Gabriele Kerner vo allne Nena gnännt. I dr Ferie z Spanie hend ihre nämlich d Iiwohner „nena“ (Das isch Katalanisch und heisst uf Dütsch „Mädchen“) gseid. D Nena hed zwei chlyni Gschwischterti, ei Schweschter namens Kristiane alias Nane und ei Brieder, wo Michael heisst. Z Hagen isch si uf es Gymnasium gangä, hed während dr 11. Klass aber ihri Uusbildig vorzytig beänded. Im November 1977 trifft si inerä Diskothek dä Gitarrischt Rainer Kitzmann, wo ihrä aabietäd, als Sängeri bi dr Band The Stripes mitzmachä. 1978 hed d Band es paar Live-Uuftritt, trennd sich aber gly wieder.
Mid em Schlagzüger Rolf Brendel gahd sie nachhär nach Wescht-Berlin, wo si alli speterä Band-Kollegä kennälernd. Im Jahr 1982 erschynt s erschtä Lied vo dr nach ihrä benanntä Band „Nena“: Nur geträumt heisst's, und wird ä grossä Erfolg. S nächschte Lied 99 Luftballons wird zum nä internationalä Mega-Hit. Nach es paar wyterä Albä und Singles trennd sich d Band im Jahr 1987.
Nu im glyche Jahr lernd d Nena dä Schauschpiiler Benedict Freitag kännä, wo si 3 Chind mid hed: dr Christopher-Daniel, wo im Alter vo nur elf Monat verschtorbä isch und d Zwilling Larissa Maria und Sakias Manuel. Im Jahr 1992 trennd sich d Nena vom Benedict Freitag. Si läbt jetz midem 12 Jahr jüngerä Schlagzüger Philipp Palm z Hamburg und hed mid ihm zwei Söhn: dr Samuel Vincent Madou und dr Simeon Joel. Im Jahr 1989 started d Nena ihri Solokarrierä mid Lieder wie zum Byschpiil Nur geträumt. I derä Zyt isch si ai als Moderatorin tätig.
Im Jahr 2002 nimmt si nüüi Versionä vo ihrne alte Lieder uf und fyred es unerwartets Comeback. S Album Willst du mit mir gehn chund im März 2005 usä und mid ihrerä Single Liebe ist schafft's d Nena uf Platz 1 vo dr dütsche Charts. Am 22. September 2006 erschyt die nüü Single Caravan of Love.