D Via Dolorosa (lat.), öbersetzt Liidenswäg, arabisch طريق الآلام, Umschrift: tariq al-alam, isch e Chrüzwäg z Jerusalem. Si füehrt dur d Altstadt vom Leuedor, hebr. שער האריות Umschrift: Scha'ar haAraiot, (oder Stephansdor) zur Grabchille. Noch dr christlige Dradition stoht die am Blatz, wo dr Jesus begrabe worde siig. Hützudag isch dr östlig Deil vo dr Strooss, d Leuedorstross, zimlig asehnlig. Dr westlig Deil isch es verwingglets Gässli zwüsche de alte Hüüser und isch deilwiis mit Bogegäng überdeckt, deilwiis vo Stäge underbroche. Zwüschduure füehrt dr Wäg über d Al-Wad-Strooss, wo vom Damaskustor zur Klagemuure füehrt.
Dr Chrüzwäg wird vo de Franziskaner in ere däglige Prozession am Nomittag vom 3 aa mit Gebät begange. D Statione I. und X. si nume währed dr Prozession öffentlig zuegänglig. Für d Erinnerig an d Uferstehig git s e zuesätzligi 15. Station.
| Stazion | Beschriibig |
|---|---|
| I. | Dr Hof vo der muslimische Mäitlischuel Omariya a Blatz, wo früehner die römischi Festig "Antonia" gstanden isch |
| II. | D Franziskanerkapelle vo der Verurdeilig und d Kapelle vo der Geisselig |
| III. | Die Polnischi Kapelle bim armenisch-katholische Patriarchat gegenüber em Östriichische Hospiz |
| IV. | Die armenisch-katholischi Kapelle zwüsche Geschäft in der Al-Wad-Strooss |
| V. | S Oratorium vo de Franziskaner an dr Chrüzig vo dr Al-Wad-Strooss und dr Via dolorosa |
| VI. | Die französisch Veronikachille und s Chloster vo de chliine Schwöstere Jesu in der Via Dolorosa |
| VII. | D Kapelle vo de Franziskaner an der Chrüzig vo dr Via dolorosa und em Suuq Khan e-Zeit |
| VIII. | S Markierigschrüz in der Wand vom griechische Chloster an der Hindersiite vo der Grabchille in der El-Khanqa-Strooss |
| IX. | S Dach vo der Grabchille, am koptische Patriarchat vorbii |
| X. | D Kapelle vo der Chleiderverdeilig näben em zuegmuurte Iigang zur Grabchille |
| XI. | Die römisch-katholischi Kapelle näbem Chrüzigungsblatz uf Golgotha in der Grabchille |
| XII. | E Loch under em griechisch-orthodoxen Altar, wo s Chrüz gstande siig |
| XIII. | Dr Salbigsstei näbem Iigang vo der Grabchille |
| XIV. | S Heilige Grab in der Grabchille |
| (XV.) | (Die römisch-katholischi Uferstehigskapelle) |
 | Dä Artikel basiert uff ere fräie Übersetzig vum Artikel „Via_Dolorosa“ vu de dütsche Wikipedia. E Liste vu de Autore un Versione isch do z finde. |