Brookm liggt twuschen Ossenbrügge un Bremen an den Dümmer. Dat Dörp liggt bi 3 km westlich vun Lemförde un nich wiet af in'n Norden vun'n Stemweder Barg. In'n Dörsnitt 7 km noordwestlich vun Brookm liggt de Dümmer See.
In ole Urkunnen steiht de Naam vun Brookm to'n eersten Mol 969 as Bruochem to lesen. 1243 heet he denn Brochem un 1247Bruchem. Dat schall woll allens Wohnsteed an'n Brook heten. Annahmen warrt, dat Brookm en Wohnsteed vun de Franken ween is.
Al in de fröhe Nutiet hett Brookm en Johrmarkt harrt, dorto twee Windmöhlen un en Tollstatschoon. Dor weer Brookm doch en beten wat anners mit, as de Naberdörper. Bavenhen geev dat en Kapell, de ehr Karkhoff al 1460 as „heel oolt“ ankeken wurrn is. De Naamspatronen vun düsse Kapell weern in dat hoge Middelöller Maria, Simon un Judas. En egen Gemeende is Brookm in dat Johr 1661 (oder 1655) wurrn, as sik de Gemeende vun Dielingen afspleten hett. De Brookmer Markt weer toeerst en Kirmes ween. He is afholen wurrn an'n Dingsdag na Simon un Juda (28. Oktober). Toeerst hett he as Kramer- un Peermarkt deent. 1558 warrt he Freemarkt nömmt un 1573Kermisse. 1673 is för den Rittmeester vun Glaen ut en Halfmeierhoff en Riddergoot maakt wurrn. Schmutte sien Gootshuus is 1815/20 na Lemförde ümsett wurrn un to de Löwenaftheek ümboot.
In den Gemeenderaat vun Brookm sitt hüdigendags 2 Raatsfroen un 9 Raatsherren. Se höört al to de Freen Wählers. Wählt wurrn sünd se an'n 10. September2006 bi de Kommunalwahl.
Jedet Johr an'n Enne vun'n Oktober bit Anfang November is in Brookm de Brookmer Grootmarkt. Dor geiht dat üm en Mengelmoos vun Vergnögen, Landmaschinenutstellen un Bedrievenschau bi üm un jedet Johr kaamt woll bi 200.000 Besöker. To'n Afsluss vun düt Spektakel, wat veer Dage duern deit, gifft dat an'n Dingsdag denn jummers den traditschonellen Veehmarkt.