Papo

Papo (Latine papa, de la Greka πάππας pappas,^[1] signifikante "patro")^[2] anke konocata kom suprega pontifiko (Latine: pontifex maximus) esas l'episkopo di la dioceso di Roma e la chefo di Katolik eklezio. Lu ank esas la chefo di stato di Vatikano.

Dum la komenco di Kristanismo, la vorto "papo" uzesis por omna episkopi,^[3] nome en l'Oriento, e por altra seniora membri dil klerikaro. Pose ca titulo rezervesis por la chefo dil episkopeyo di Roma, e la rezervo divenis oficala dum la 11ma yarcento.

Katolik eklezio asertas ke la pastorala ofico dil Eklezio komencis kun grupo di apostoli, havinta Santa Petrus kom lia chefo. Segun l'Eklezio Katolika, Iesu Kristo indikis Petrus kom chefo di lua Eklezio, e pos lua rivivigo Petrus iris a Roma e fondis komunitato kristana ibe. To suportis la kresko di papal autoritato.

Til nun, l'altra titulo di la papo esas "episkopo di Roma", e la papi judikesas kom sucedanti de Petrus. Fakte l'autoritato dil papo evolucionis pokope dum la yarcenti. Kom supra chefo dil Eklezio Katolika, la papo havas la sama fakultati kam altra episkopi, ed altri qui esas exkluziva por lu, exemple deklarar santa ula persono (kanonizo), nominar kardinali e deklarar dogmati.