Olga Syahputra

Olga Syahputra iku anak pambarep saka pitu sadulur.^[2] Dhèwèké keturunan Padang-Jawa. Olga Syahputra anak saka pasangan Nur Rachman lan Nurhida.^[2] Olga Syahputra nduwéni kasenengan njaluk tandhatangan lan foto bareng karo idholané. Saya suwé Olga Syahputra ditawani main ing filem Lenong Bocah.^[2] Sadurungé main ing Lenong Bocah, Olga Syahputra kudu gladhen dhisik ingSanggar Ananda.^[2] Amarga ora nduwé dhuwit, Olga banjur adol kulkas supaya bisa mbayar kursus ing Sanggar Ananda.^[2] Kanca raketé Olga Syahputra kang jenengé Bertrand Antolin banjur rumangsa mesaké lan nukokaké kulkas anyar kanggo Olga Syahputra.^[2]

Nalika isih aktif gladhen ing Sanggar Ananda, Olga Syahputra uga kerep mèlu syuting sanajan mung dadi peran pembantu. Olga Syahputra uga tau dadi asisten penyanyi kang jenengé Rita Sugiarto.^[3] Sawisé Olga Syahputra main ing sinétron Kawin Gantung lan Si Yoyo, Olga Syahputra dadi presenter Ngidam ing SCTV. Olga Syahputra dadi presenter karo Jeremy Thomas.^[3] Olga uga bisa nglawak ing acara komedi Jangan Cium Gue lan Extravanganza ABG.^[3] Nalika nggabung karo Extravanganza ABG ing taun 2005, jeneng Olga Syahputra wiwit dikenal.^[3] Jenéng Olga Syahputra banjur misuwur nalika lumebu taun 2007.^[3] Nalika iku Olga Syahputra nggabung karo Indra Bekti lan Indy Barends ing acara Ceriwis kang disiyaraké ing Trans TV.^[3]