ბრატისლავის ტრანსპორტი

დაკავშირებული ინფორმაცია ასევე შეგიძლიათ იხილოთ სტატიებში: ბრატისლავის ტრამვაი, ბრატისლავის ტროლეიბუსი და ბრატისლავის ავტობუსი.

ბრატისლავის საქალაქო საზოგადოებრივი ტრანსპორტი ყველაზე დიდი საქალაქო ტრანსპორტის ქსელია სლოვაკეთში. იგი მოიცავს საქალაქო საზოგადოებრივი ტრანსპორტის სამ სახეობას: ტრამვაი, ტროლეიბუსი და ავტობუსი (მცირე დროით მასში შედიოდა ასევე ერთი სარკინიგზო ხაზი); ტრამვაის ხაზები წარმოადგენს სატრანსპორტო სისტემის ხერხემალს, რომელსაც ავსებს ტროლეიბუსი, ხოლო ავტობუსი ემსახურება გარეუბნებს და მოშორებულ დასახლებებს. პირველი ტრამვაის ხაზი გაიხსნა 1895 წელს.

მიუხედავად ამისა ტრამვაის გამტარუნარიანობა ბევრ ადგილზე არასაკმარისია; 1980-იანი წლების ბოლოს დაიწყო მეტროს ხაზის მშენებლობა პეტრჟალკიდან ქალაქის ცენტრამდე, რომელიც ხავერდოვანი რევოლუციის წინ (1989) შეწყდა და მას შემდეგ მშენებლობა აღარ განახლებულა. ბევრჯერ შეიცვალა ამ სარკინიგზო ხაზის კონცეფცია და 2013 წელს გადაწყდა რომ მეტროს ნაცვლად აქ აშენდებოდა ტრამვაის ხაზი, რომელიც 2016 წლის 8 ივნისს გაიხსნა.

მგზავრობის გადახდის სისტემა

ბილეთების შეძენა შესაძლებელია გაჩერებებზე დამონტაჟებულ ავტომატებში, ჯიხურებში ან სატრანსპორტო გაერთიანების სალაროებში. შესაძლებელია გრძელვადიანი ბილეთების შეძენა. 2008 წლის 17 ნოემბრიდან შესაძლებელია მგზავრობის საფასურის გადახდა SMS-ის საშუალებით. 2009 წლის თებერვლიდან შესაძლებელია გრძელვადიანი ბილეთების ყიდვა ინტერნეტის საშუალებით. 2011 წლიდან გაუქმდა ბილეთების შეძენის საშუალება ცალკეულ სატრანსპორტო სარტყელებზე რითაც ასევე გაუქმდა სატრანსპორტო სარტყელები და შეიძლება მხოლოდ ერთი ტიპის ბილეთის ყიდვა, რომელიც მოქმედებს მთელ ქალაქში. ამასთანავე აღარაა საჭირო ღამის ტრანსპორტისთვის ცალკე ბილეთის ყიდვა.

ბრატისლავამდე მიდის ოთხი ავტობანი: D1, D2 რომელიც აკავშირებს ჩეხურ ავტობან D2-ს და უნგრულ M15-ს, D4 რომელიც ავსტრიიდან მომავალ A6-ს D2-თან. ამ ცნობილ ავტობანებს ერთმანეთთან აკავშირებს ოთხზოლიანი ავტოსტრადა, რომელიც გადის ქალაქზე და გვერდს უვლის მის ცენტრს (პეტრჟალკისა და აეროპორტის მიმდებარე ტერიტორიის გავლით).

ბრატისლავა ცნობილია თავისი სარკინიგზო კვანძით, სამგზავრო მატარებლებისთვის მთავარი სადგურია ბრატისლავა ჰლავნა სტანიცა (Bratislava hlavná stanica), სატვირთო მატარებლებისთვის მახარისხებელი სადგური ბრატისლავა ვიიხოდ (Bratislava východ), ასევე არის შემდეგი სადგურები: ბრატისლავა-პეტრჟალკა, ბრატისლავა ნოვე-მესტო, ბრატისლავა-ვინოჰრადი და სხვა. რკინიგზის მთავარი მიმართულებები იმეორებს საავტომობილო ტრასების ძირითად მიმართულებებს; ძირითადი სარკინიგზო მიმართულებებია: ჩეხეთისკენ, სლოვაკეთის ცენტრალური რეგიონებისკენ, უნგრეთისკენ და ავსტრიისკენ.

მთავარი და ერთადერთი საერთაშორისო სამგზავრო აეროპორტია მ. რ. შტეფანიკის სახელობის აეროპორტი, რომელიც ყველაზე დიდი აეროპორტია რესპუბლიკაში (მისი ფართობია 477 ჰა).

• შეგიძლიათ იხილოთ მედიაფაილები თემაზე „ბრატისლავის ტრანსპორტი“ ვიკისაწყობში.
• ბრატისლავის სატრანსპორტო გაერთიანების საიტი
• ბრატისლავის აეროპორტის საიტი დაარქივებული 2007-02-02 საიტზე Wayback Machine.
• ინფორმაცია სლოვაკეთის საქალაქო ტრანსპორტზე დაარქივებული 2017-04-24 საიტზე Wayback Machine.