ვასილკივის ბრძოლა

26 თებერვალს, გამთენიისას, რუსეთის საჰაერო-სადესანტო ძალების მედესანტეებმა დაიწყეს ქალაქ ვასილკივთან დაშვება. იგი კიევიდან სამხრეთით 40 კმ-ში მდებარეობს. მიზანს წარმოადგენდა ვასილკივის ავიაბაზის დაკავება. ქალაქში მძიმე ბრძოლები გაიმართა რუს მედესანტეებსა და უკრაინელ დამცველებს შორის.^[4][5]

ამერიკელი და უკრაინელი ოფიციალური პირების მიხედვით, 01:30 საათზე უკრაინულმა გამანადგურებელმა სუ-27-მა ჩამოაგდო რუსული ილ-76, რომელშიც მედესანტეები იმყოფებოდნენ.^[6][7] 03:20 საათზე მეორე ილ-76 ჩამოაგდეს ახლომდებარე ქალაქ ბილა-ცერქვასთან.^[8][9][10]

ვასილკივის მერმა ნატალია ბალასინოვიჩმა განაცხადა, რომ შეტაკებების დროს 200-ზე მეტი უკრაინელი დაიჭრა.^[11][12] მოგვიანებით მან ასევე აღნიშნა, რომ უკრაინულმა ძალებმა მოიგერიეს რუსი მედესანტეების თავდასხმა ქალაქთან ახლოს მდებარე ავიაბაზაზე და ცენტრალურ ქუჩაზე, ქალაქში კი ვითარება დაწყნარდა.^[13][14] „Wall Street Journal“ იტყობინებოდა, რომ უკრაინული ძალები დილით ქალაქში პატრულირებდნენ და რუს ჩამორჩენილ ჯარისკაცებს ეძებდნენ.^[15][16]

27 თებერვალს, გამთენიისას, ვასილკივში მდებარე ნავთობის საცავს რუსული რაკეტა მოხვდა და ცეცხლი გაუჩნდა.^[17] 12 მარტს რუსული სარაკეტო თავდასხმის შედეგად განადგურდა ავიაბაზა.^[18]

2 აპრილს უკრაინის თავდაცვის სამინისტროს მიერ გავრცელდა ინფორმაცია, რომ კიევის ოლქიდან (სადაც მდებარეობს ვასილკივი) რუსული ნაწილების გასვლის შემდეგ მთელ ოლქზე კონტროლი აღადგინა ცენტრალურმა ხელისუფლებამ.^[19]

• ჰოსტომელის აეროპორტისათვის ბრძოლა