ഹിലാരി സ്വാങ്ക്

1974 ജൂലൈ 30 ന്, അമേരിക്കയിലെ നെബ്രാസ്കയിലാണ് ഹിലാരി ജനിച്ചത്. സ്റ്റീഫൻ മൈക്കിൾ സ്വാങ്കും, ജൂഡി കേയുമായിരുന്നു മാതാപിതാക്കൾ.^[3] ഹിലാരിക്ക് ആറു വയസ്സുള്ളപ്പോൾ അവരുടെ കുടുംബം വാഷിങ്ടണിലേക്കു താമസം മാറി. ഹാപ്പി വാലി എലമെന്ററി സ്കൂൾ, ഫെയർഹെവൻ മിഡ്ഡിൽ സ്കൂൾ, സീഹോം ഹൈസ്കൂൾ എന്നിവിടങ്ങളിലായിട്ടായിരുന്നു ഹിലാരിയുടെ സ്കൂൾ വിദ്യാഭ്യാസം. സ്കൂൾ വിദ്യാഭ്യാസകാലത്തു തന്നെ പാഠ്യേതരവിഷയങ്ങളിൽ ഹിലാരി മികവു തെളിയിച്ചിരുന്നു. ജൂനിയർ ഒളിംപിക്സിലും, വാഷിങ്ടൺ സ്റ്റേറ്റ് ചാംപ്യൻഷിപ്പിലും ഹിലാരി പങ്കെടുത്ത് സമ്മാനങ്ങൾ നേടിയിരുന്നു.

തന്റെ ഒമ്പതാമത്തെ വയസ്സിലാണ് ഹിലാരി, ആദ്യമായി കലാരംഗത്ത് പ്രത്യക്ഷപ്പെടുന്നത്. ജംഗിൾ ബുക് എന്ന പരമ്പരയിലായിരുന്നു ഹിലാരി ആദ്യമായി പ്രത്യക്ഷപ്പെട്ടത്. പിന്നീട്, സ്കൂളുമായി ബന്ധപ്പെട്ടും പുറത്തും കലാരംഗത്ത് ഹിലാരി സജീവമായി. തന്റെ പതിനഞ്ചാമത്തെ വയസ്സിൽ ഹിലാരിയുടെ മാതാപിതാക്കൾ വേർപിരിഞ്ഞു. മകളുടെ അഭിനയത്തിലുള്ള കഴിവ് തിരിച്ചറിഞ്ഞ ജൂഡി മകളേയും കൊണ്ട് ലോസ് ഏഞ്ചൽസിലേക്കു താമസം മാറി. സ്വന്തമായി ഒരു വാടകവീട്ടിൽ താമസിക്കാനാവശ്യമായ പണം കിട്ടുന്നതുവരെ അവർ കാറിലായിരുന്നു കഴിഞ്ഞിരുന്നത്.^[4] കഷ്ടപ്പാടുകൾക്കിടയിലും, കഠിനപ്രയത്നത്തിലൂടെ അഭിനയമേഖല കീഴടക്കാൻ കഴിഞ്ഞതിന് തനിക്ക് പ്രചോദനമായത് തന്റെ അമ്മയാണെന്ന് ഹിലാരി ഒരു അഭിമുഖത്തിനിടെ പറഞ്ഞിരുന്നു.^[5][6]

എമിലി, സ്മിത്ത് (2012). ഹിലാരി സ്വാങ്ക് ഹാന്റ്ബുക്ക്. എമിരിയോ പബ്ലിഷിംഗ്. ISBN 1743441584.