စက်ဘီးစီးခြင်း
စက်ဘီးစီးခြင်း (cycling or bicycling or biking)သည်သယ်ယူပို့ဆောင်ရေးအတွက်ဖြစ်စေ၊ အားလပ်ချိန်အပန်းဖြေမှု(recreation)အတွက်ဖြစ်စေ၊ အားကစားအနေဖြင့်ဖြစ်စေ စက်ဘီးကိုအသုံးပြုခြင်းကိုဆိုလိုသည်။[၁]ဤသို့အသုံးပြုသူများကို မြန်မာဘာသာတွင် ရိုးရိုးသာမန်အပျော်စီးခြင်းဖြစ်စေ၊ သယ်ယူပို့ဆောင်ရေးအတွက်ဖြစ်စေ စီးသူများကိုစက်ဘီးစီးသူများဟု ခေါ်ကြပြီး၊ အားကစားပြိုင်ပွဲဝင်စီးသူများကိုမူစက်ဘီးအားကစားသမားများဟု ခေါ်ကြသည်။ အင်္ဂလိပ်ဘာသာတွင်မူ ဆိုက်ကလစ်(cyclists)[၂]၊ ဘိုင်ဆိုက်ကလစ် (bicyclists)[၃] သို့မဟုတ်ဘိုက်ကာ(bikers)[၄]ဟုခေါ်ကြသည်။ ဘီးနှစ်လုံးတပ် စက်ဘီးများသာမက၊ ဘီးတစ်လုံးတပ်စက်ဘီးများ (unicycles)၊ ဘီးသုံးလုံးတပ်စက်ဘီးများ(tricycles)၊ ဘီးလေးလုံးတပ်စက်ဘီးများ (quadracycles)၊ အိပ်နင်းစက်ဘီးများ(recumbent) အစရှိသည့် လူအားဖြင့် မောင်းနှင်သော ဘီးတပ်ယာဉ်များအားစီးနင်းခြင်းအားလုံးကိုလည်း စက်ဘီးစီးခြင်းဟုပင် ခေါ်ကြသည်။
စက်ဘီးများကို ၁၉ ရာစုတွင် စတင်အသုံးပြုလာကြပြီး၊ ယခုအခါကမ္ဘာတစ်ဝန်းလုံးတွင် ခန့်မှန်းခြေ တစ်ဘီလီယံ (သန်းတစ်ထောင်)ခန့် အရေအတွက်ရှိသည်။[၅]စက်ဘီးစီးခြင်းသည် ကမ္ဘာ့နေရာအများအပြားနှင့် အထူးသဖြင့် လူနေထူထပ်သော ဥရောပမြို့ကြီးများတွင်တစ်နေရာမှတစ်နေရာသို့ သွားလာခြင်းအတွက် အဓိကသယ်ပို့နည်းလမ်းများ ဖြစ်နေသည်။[၆]
စက်ဘီးစီးခြင်းကို တာတို သို့မဟုတ် တာလတ်ခရီးအကွာအဝေးများအတွက်ထိထိရောက်ရောက်နှင့် အကျိုးများသော သယ်ယူပို့ဆောင်မှုနည်းလမ်းတစ်ခု[၇][၈]အဖြစ်အများစုက မှတ်ယူကြသည်။