Lena Meyer-Landrut

Na den Vadder siene Sieten hen is Lena Meyer-Landrut en Grootdochter vun den düütschen Diplomaten Andreas Meyer-Landrut.^[2][3] De Öllern sünd fröh ut’neen gahn un so is se alleen bi ehre Mudder in den hannöberschen Stadtdeel Misborg-Anderten upwussen.^[4] De Vadder weer utbüxt, as se twee Johre oolt weer.^[5] Meyer-Landrut besöcht de IGS Roderbruch Hannober.^[6] Al mit fiev Johren hett se mit de Danzeree anfungen. Na Ballett un Jazz Dance hett se sik mit Show-Dance befaat, de ut Hip-Hop, Jazz- un Utdrucksdanz tohopenschostert is.^[7] Blangenbi hett se Spaaß harrt bi dat Singen. 2007 hett se mit en Schoolfründ dat Musikduo „Stenorette 2080“ grünnt. De Naam weer vun de Dikteer-Reedschop Stenorette hernahmen, wo se ehre beiden eersten Songs mit upnahmen harrn.^[8] Se seggt, ehre musikaalschen Vörbiller, dat weern unner annern Clueso, Adele, Kate Nash, Vanessa Carlton un de düütsche Popgruppe Wir sind Helden. Ehr se mit de Singeree groot rutkamen is, hett se al in de Feernsehserien K11 – Kommissare im Einsatz, Helfen Sie mir! un Richter Alexander Hold as Komparsin mitmaakt.^[9]

In’n Harvst 2009 hett se sik anmellt bi de Castingshow Unser Star für Oslo, dat is de düütsche Vör-Utwahl för den Singer-Wettstriet in Oslo ween. ARD un ProSieben hefft düsse Vör-Utwahl tohopen utricht'. Unner mehr as 4.500 Lüde is se een vun de 20 ween, de bi de beiden eersten Feernsehshows mitmaken dröffen. Dor hett se denn wunnen un is, as düütschen Deelnehmer, na Oslo henstüert wurrn.

Ehr Winnerleed Satellite hett in Düütschland glieks den eersten Platz in de Charts hoolt un is up Youtube unbannig veel upropen wurrn. Bi de Endrunn vun’n Eurovision Song Contest 2010, de an’n 29. Mai 2010 stattfunn, hett se de hele europääsche Kunkurrenz achter sik laten un as tweete düütsche Singersche – na Nicole in’t Johr 1982 – den Wettstriet wunnen.

Punkte för Lena Meyer-Landrut:

Afstimmen dröffen all 39 Länner, de in de Halffinals un in dat Finale mitmaakt hefft. Een Land dröff dorbi nich för den egen Bidrag stimmen.

Mit 14,69 Millionen Tokiekers un en Marktandeel vun 49,1 % is dat de European-Song-Contest mit de meisten Tokiekers ween, sietdem dat Privatfeernsehn inföhrt wurrn is.

Alben

Singles

• 2010: nomineert för den VIVA Comet in de Kategorie Dörstarter vun’t Johr^[12]
• 2010: Winner bi den 55. Eurovision Song Contest