Paula-Mae Weekes
Paula-Mae Weekes (fødd 23. desember 1958[1]) er ein trinidadisk jurist som var president i Trinidad og Tobago frå 19. mars 2018 til 20. mars 2023. Weekes etterfølgde Anthony Carmona og blei fyrste kvinne i presidentembetet. Ho var også den andre kvinnelege presidenten i Amerika av afrikansk avstamming etter Ertha Pascal-Trouillot.[2][3][4]
| Paula-Mae Weekes | |||
 | |||
| Fødd | 23. desember 1958 (65 år) Port of Spain | ||
|---|---|---|---|
| Statsborgar av | Trinidad og Tobago | ||
| Parti | partilaus | ||
| Yrke | jurist, politikar, advokat | ||
| Utdanna ved | Hugh Wooding Law School University of the West Indies - Cave Hill Campus | ||
| Alle verv |
| ||
Liv og virke
Bakgrunn
Weekes blei fødd i Port of Spain. Etter vidaregåande skulegang ved Bishop Anstey High School i Port of Spain, byrja ho på jusstudium ved University of the West Indies på Cave Hill på Barbados. Ho har bachelorgrad i juss frå der og Legal Education Certificate frå Hugh Wooding Law School i St. Augustine i heimlandet. Ho blei advokat i 1982.[5]
I 2000 var Weekes fellow ved Commonwealth Judicial Education Institute i Halifax i Canada.[6]
Jurist- og dommarkarriere
Weekes arbeidde for påtalemakta i elleve år. Frå 1993 var ho privatpraktiserande advokat.[5][7]
I 1996 blei Weekes utnemnd til dommar i High Court. Frå 2005 til 2016, då ho gjekk av med pensjon, var ho appellrettsdommar i høgsterett.[5]
I februar 2017 blei Weeks dommar på Turks- og Caicosøyane, der ho blei innsett som dommar i Turks and Caicos Islands Court of Appeal.[8]
Ved sida av arbeidet som dommar, har Weekes undervist. I åra 2011 til 2016 heldt ho kurs i etikk ved Hugh Wooding Law School.[7] Ho har også vore aktiv innan Organisasjonen for austkaribiske statar.[9]
Den anglikanske kyrkja
Weekes har hatt ei leiarrolle i den anglikanske kyrkja, der ho i 20 år har vore kanslar for bispedømmet Trinidad og Tobago i Church in the Province of the West Indies.[10]
President
Weekes blei nominert til presidentembetet av statsminister Keith Rowley.[11] Nominasjonen fekk støtte frå opposisjonen og det blei ikkje nominert andre kandidatar.[9] Weekes blei dimed erklært som valvinnar då valforsamlinga møttest.[12] Weekes blei fyrste kvinne vald til embetet som president i Trinidad og Tobago.[13]
Weekes blei innsett i presidentembetet 19. mars 2018.[14] Ho blei etterfølgd av Christine Kangaloo i mars 2023.[15]
