Samoa a l'é un pais dl'Osseania. A l'é formà da la part ossidental ëd l'arsipélagh dle ìsole Samoa, a mesa stra tra la Neuva Zelanda e le Hawaii. La part oriental ëd l'arsipélagh a l'é un possediment dij Stat Unì.
A l'ha na surfassa ëd 2.831 km² e a conta anviron 215.000 abitant. La capital a l'é Apia.
L'arsipélagh dle Samoa a l'é stàit spartì, dël 1899, tra la Gërmania e ij Stat Unì. Dël 1914 la Neuva Zelanda a l'ha ocupà la part tedesca e a l'ha ministrala fin al 1962, quand a l'ha otnù l'indipendensa con ël nòm ëd Samoa Ossidentaj. Dël 1997 a l'ha tramudà 'l nòm a Samoa.
Lenghe ofissiaj
Samoa a l'ha doi lenghe ofissiaj: ël samoan e l'anglèis.
Spòrt
Lë spòrt nassional a l'é 'l rugby. La squadra nassional (stranomà Manu Samoa) a l'ha partecipà a quatr Campionà dël Mond e a l'é fra le 12 pi fòrt al mond.
Organisassion polìtica
Samoa (nòm ofissial: Malo Sa'oloto Tuto'atasi o Samoa / Independent State of Samoa) a l'é una repùblica. Ël cap dlë stat (sò titol an samoan a l'é O le Ao o le Malo) a l'é Tuimalealiifano Va'aletoa Sualauvi II (dal 2017). Ël prim ministr a l'é Naomi Mata'afa (dal 2021).