Mababang paaralan
Ang mababang paaralan o paaralang primarya (Ingles: primary school o elementary school) ay ang paaralan na nagbibigay ng unang bahagi ng edukasyon ng mga bata. Ang mga batang nag-aaral sa mababang paaralan ay karaniwang nasa edad na mula lima hanggang labing isang taong gulang.[1] Dito napag-aaralan ng mga bata ang mga kasanayan na nagsisilbing pundasyon para maihanda sila sa pagharap sa buhay, trabaho at kung paano maging aktibong mamamayan.[2]
Paaralang elementarya sa Pilipinas
Noong taong pampaaralan (Ingles: school year) 2021 hanggang 2022, mayroong 43,090 na mga paaralang elementarya sa buong bansa.[3] Karamihan sa mga ito ay nasa mga rehiyon ng III, VI-A, V, VI, VII, at VIII.[3][4] Dito ay nag-aaral ang 12,796,802 na mga bata.[5]
Ayon sa Departamento ng Edukasyon, dalawa sa bawat tatlong gusaling pangpaaralan ang nangangailangan ng pagkukumpuni at tinatayang may kakulangan pa ng 91,000 na mga silid-aralan.[6]
Ang mga paaralang elementarya sa Pilipinas ay naitayo mula pondo ng Departamento ng Edukasyon, lokal na gobyerno, pribadong sektor, Senado, Kapulungan ng mga Kinatawan (Ingles: House of Representatives) at iba pang ahensiya ng gobyerno ng Pilipinas.[7] Mayroon ding mga gusali ng paaralan na pinondohan ng mga dayuhan.[7]
Paaralang elementarya sa Estados Unidos
Noong taong pangpaaralan 2019 hanggang 2020, mayroong 70,039 na pangpublikong paaralan para sa prekindergarten, elementarya, at gitnang (Ingles: middle) na edukasyon at 18,870 na pribadong paaralan para prekindergarten, elementarya, at gitnang edukasyon.[8]