ისლამაბადი (ურდუ: اسلام آباد) — პაკისტანიშ ნანანოღა, იდვალუაფუ პოტოჰარიშ პლატოს ქიანაშ ოორუე ნორთის, ისტორიულ პენჯაბიშ დო ოორუე-ბჟადალი ოხურგე პროვინციაშ (მარგალაშ ჸალაიბონი ისტორიული კარიბჭე რდჷ თე პროვინციას) ოთხშარააკართაფუს. რავალპინდი თიშ დაჸოფილ ნოღათ იკოროცხუ თე ჟირ ნოღაშ სიახოლაშ გეშა.
ნოღაქ 1960-იან წანეფს აკიგჷ პაკისტანიშ ნანანოღაშ კარაჩიშე გინაღალარო. ქიანაშ გოვითარაფა თიმ ბორჯის კარაჩიშ ელმოლს მუთმოხვადუდჷ დო პრეზიდენტ აიუბ ხანს ოკოდჷ გოვითარაფა უმოსი თინწორას გოფაჩელედკო. ისლამაბადი ალმახანური დო სუფთა ნოღა რე, გიშაკერძაფილო პაკისტანიშ შხვა ნოღეფწკჷმა ელაზჷმაფათ. ნოღა ბრუო ზონათ რე დორთილი: დიპლომატური ანკლავი, კომერციული განბა, გონათუაშ სექტორი, ინდუსტრიული ზონა დო თეშნ., თინეფშე ირს მუში სავაჭარო არე დო პარკი უღუ. ისლამაბადის რე თაშნეშე ფეიზალიშ მეჩეთი, ნამუთ ჯოხოგოლაფირი რე თიშ არქიტექტურათ დო სიდიდათ. მეჩეთი ნოღას აჩუქჷ საუდიშ არაბეთიშ მაფა ფეიზალქ.
