ჩიკაგოშ უნივერსიტეტი

ჩიკაგოშ უნივერსიტეტი (ინგლ. University of Chicago) — კერძო უნივერსიტეტი ააშს, ილინოისიშ შტატიშ ნოღა ჩიკაგოს. უნივერსიტეტი 1890 წანას დარსხუ ამერიკაშ ბაპტისტური გონათაფაშ ჯარალუაქ, ამერიკალი ფილანთროპეფიშ ჯონ როკფელერიშ დო მარშალ ფილდიშ ფინანსური მოხვარათ. უნივერსიტეტიშ თარი კემპუსი იდვალუაფჷ ჩიკაგოშ ჰაიდ-პარკიშ რაიონს. ჩიკაგოშ უნივერსიტეტი ამერიკაშ ართ-ართი პრესტიჟული უნივერსიტეტი რე დო თის მოსოფელიშ უნივერსიტეტეფიშ რეიტინგეფს ლიდერი პოზიცია უკინებჷ.

ჩიკაგოშ უნივერსიტეტი ინგლ. University of Chicago
დევიზი	Crescat scientia; vita excolatur (ლათ.)
დირსხუ	1890
ტიპი	კერძო
ფონდეფი	$ 11.6 მლრდ. (2021)
წორომახანდე	2,859
პრეზიდენტი	პოლ ალივასტოსი
პროვოსტი	კა იი კრისტინა ლი
სტუდენტი	18,452
ორენი	ჩიკაგო, ილინოისი, ააშ
კამპუსი	ურბანული
საიტი	uchicago.edu

ჩიკაგოშ უნივერსიტეტი იკათუანს კოლეჯის, რკვიებეფიშ ხუთი ცენტრის, ბრუო პროფესიულ სკოლას. უნივერსიტეტის ჩიკაგოშ გარდა, კემპუსეფი დო რკვიებეფიშ ცენტრეფი უღჷ მოსოფელიშ შხვადოშხვა ნოღეფს: ლონდონს, პარიზის, პეკინს, დელის დო ჰონგ-კონგის.

ჩიკაგოშ უნივერსიტეტიშ კურსნათებუეფქ მიშეღეს დიდი კონტრიბუცია მენცარობაშ შხვადოშხვა დისციპლინეფიშ: ეკონომიკაშ, იურისპრუდენციაშ, მათემატიკაშ, ფიზიკაშ, სოციოლოგიაშ, პოლიტოლოგიაშ გოვითარაფაშა დო მუნეფიშ რკვიებეფით დარსხუეს ჩიკაგოშ სკოლა შხვადოშხვა დარგეფს. მაგალთო არსებენს ეკონომიკაშ ჩიკაგოშ სკოლა, მათემატიკაშ ჩიკაგოშ სკოლა, არქიტექტურაშ ჩიკაგოშ სკოლა, სოციოლოგიაშ ჩიკაგოშ სკოლა დო შხვეფი. ჩიკაგოშ უნივერსიტეტიწკჷმა რე აფილირებული: ფერმიშ ერუანული აქსელერატორული ლაბორატორია (ფერმილები), არგონიშ ერუანული ლაბორატორია დო ოზუღე ბიოლოგიაშ ლაბორატორია.

ჩიკაგოშ უნივერსიტეტიშ კურსნათებუეფი დო უნივერსიტეტიწკჷმა აფილირებულეფი რდეს: ნობელიშ პრემიაშ 94 ლაურეატი, ფილდსიშ მენდალიშ 10 ლაურეატი, ტიურინგიშ პრემიაშ 4 ლაურეატი, 52 მაკარტურიშ სტიპენდიანტი, 26 მარშალიშ სტიპენდიანტი, 53 როდსიშ სტიპენდიანტი, პულიცერიშ პრემიაშ 27 ლაურეატი, ერუანული ჰუმანიტარული მენდალიშ 20 ლაურეატი, 29 მილიარდერი დო ოლიმპიადეფიშ 8 მედალისტი.