主角
- 作出對情節（plot）有具體影響嘅決策；
- 承擔佢決策帶嚟嘅後果；
- 用佢嘅行動會令到情節得以演進；
- 喺故仔嘅途中面對重大嘅困難，並且嘗試解決呢啲困難（不過佢唔一定要成功，悲劇性嘅故仔就往往會講主角遇到重大失敗）；
- 會同對立角色（antagonist）對抗；
- 成為讀者觀眾嘅注意力中心（不過主角可以唔引起故仔世界入面第啲角色嘅注意）；
另一方面，如果一個故仔嘅情節有多條子情節（subplot），噉每一條子情節都可以有佢嘅主角[3]。
主角唔一定係英雄：英雄主角（hero protagonist）係最常見嘅主角類型，指正義（或者至少唔係壞人）嘅主角，會做「打低奸角」同「拯救世界」等嘅好事，例子有同罪犯戰鬥嘅蝙蝠俠以及查案捉罪犯嘅大偵探福爾摩斯呀噉[4]；另一方面，奸角主角（villain protagonist）指扮演奸角嘅主角，一個奸角主角會想做壞事，而呢點會有搞到觀眾憎佢嘅危險，所以奸角主角寫起上嚟要好有技巧先得[5]。
角色發展
- 想像以下嘅故仔：王子係一個以貌取人嘅人，有次佢對一個醜樣嘅阿婆唔禮貌（決策），而個阿婆原來係仙子，跟住仲對佢落咒、令佢變成一隻醜樣嘅野獸（承受決策帶嚟嘅後果）；後嚟佢因緣巧合，捉到一個老男人，個老男人嗰個心地善良嘅女（女主角）自願噉用自己嘅自由嚟換取阿爸嘅；及後女主角留喺野獸嘅城堡當中（有機會改變），兩人相處之後，野獸受女主角影響學識變得仁慈啲同開放自己嘅心（行動影響情節），最後破解仙子嘅咀咒（角色發展）。
- 想像以下嘅故仔：主角阿古係一個大賊，一心淨係想專注於佢嘅事業，而且性格有少少冷漠無情（缺憾），佢嘅性格令佢有錢、但生活得好孤單（承受決策帶嚟嘅後果）；有一次，阿古因緣際會領養咗三個孤兒，而且焗住要好好噉湊住佢哋，暫時扮演養父嘅角色（被迫要作出改變）；及後佢回想起自己嘅童年，原來佢細個嗰陣成日都俾佢阿媽睇唔起，所以先搞到佢咁執著要成功（背景故仔；順帶一提，喺一個角色成長途中，故仔好多時會揭示令到嗰個角色有缺憾嘅背景故仔），最後佢作出改變開始重視同屋企人來往（行動影響情節），而且亦都得到真正嘅快樂（角色發展）[6]。
假主角
假主角（false protagonist / decoy protagonist）係指一個開始嗰陣望落係主角、但實際上並唔係主角嘅角色。舉個例說明，想像一個故仔，第一章講探險家阿莊去到一個山旯旮嘅遺跡冒險（而個故仔可以乘機喺呢段情節當中透露有關個遺跡嘅資訊），而第一章最尾係講阿莊踩到陷阱死亡；然後去到第二章，故仔鏡頭移去侯活嗰度，侯活先至係主角，而故仔淨低嘅部份就係講侯活去嗰個遺跡嗰度冒險，而且由侯活嘅角度睇嘢；喺呢個例子裏面，阿莊就係一個假主角。假主角喺寫作上有唔少嘅用途，例如係用嚟突顯個故仔世界嘅危險－阿莊嘅死用嚟突顯個遺跡有幾咁危險（而且因為第一章成段都係由阿莊嘅角度睇嘢嘅，所以佢嘅死會對讀者有更大嘅情緒衝擊），令呢場冒險感覺更加驚險刺激[7]。
睇埋
文獻
- Eco, Umberto. 2009. On the ontology of fictional characters: A semiotic approach. Sign Systems Studies, 37(1/2): 82–98.
- Pringle, David. 1987. Imaginary People: A Who's Who of Modern Fictional Characters. London: Grafton. ISBN 0-246-12968-9.
- Paisley Livingston & Andrea Sauchelli, "Philosophical Perspectives on Fictional Characters", New Literary History, 42, 2 (2011), pp. 337–60.
攷
拎
- The Protagonist. TV Tropes.