偷襲珍珠港
偷襲珍珠港，又叫珍珠港事件或者珍珠港事變，係1941年12月7號（美國時間）清晨，日本聯合艦隊嘅飛機同迷你潛艇，突然襲擊美國太平洋艦隊喺夏威夷檀香山嘅基地珍珠港，同埋歐胡島上美軍飛機場嘅事件。偷襲直接促使美國喺第二日正式參戰。日本軍部稱呢次軍事行動為夏威夷行動同埋AI行動，[1][2]計劃時稱Z行動。[3]日本之所以偷襲珍珠港，就係想癱瘓美國太平洋艦隊。咁日本打東南亞嘅大英帝國、荷蘭同美國領地嗰陣，美國就阻唔到佢。喺日本突襲珍珠港嘅七個鐘內，日軍仲攻打埋美國嘅菲律賓、關島同埋威克島，英國嘅馬來亞、星加坡同香港。[4]
衝突背景
外交背景
日本同美國早喺1920年代起就意識到佢哋有機會爆發戰爭，而且亦有計劃應對。日本自1890年代就好警愓美國喺太平洋嘅區域同軍事擴張。當其時美國吞併太平洋嘅島嶼，例如夏威夷同菲律賓，令日本感到美國已經接近或者干涉佢嘅勢力範圍。[5][6][7][8]
雖然日本喺美國拒絕咗種族平等議案[9]後開始對美國採取警誡政策，但兩國仍然可以和平合作，維持貿易。[10][11][12]直到1931年日本入侵滿洲之前，兩國關係都未有變壞。之後十年，日本喺中國擴張，令第二次中日戰爭喺1937年爆發。為咗喺東亞大陸贏得勝利，日本花心機孤立中國，又去確保足夠物資供應。「南進政策」就係為咗呢啲目的而度出嚟嘅。[6][13]自從1937年發生咗好多事，令日本喺西方社會嘅民意下滑，例如日本擊沉美軍柏奈號、日本士兵掌摑美國駐南京領事艾力臣同南京事件。美國試圖提議同英國一齊禁運日本但失敗。[14] 1938年，應總統羅斯福呼籲，美國公司唔再賣軍用品畀日本。[15]
1940年，日本入侵法屬印度支那，想截斷中國嘅補給線。當時美國終止運往日本嘅飛機、零件、機械同埋飛機油，所以日本認為美國對佢哋唔友善。[nb 1]但係美國冇停到石油出口，部分原因係華府普遍認為日本依賴美國石油，萬一停咗，日本就可能會當佢係極度挑釁。[5][12][16]
1940年年中，羅斯福總統調走太平洋艦隊，由聖地牙哥調去夏威夷。[17] 佢仲命令菲律賓準備打仗，想用呢兩招阻止日本喺遠東擴張。因為日本軍部（誤）以為佢哋一進攻英國嘅東南亞殖民地，包括星加坡[18] 會拉埋美國入戰。為咗阻止美國海軍干涉佢哋喺東南亞嘅行動，日本要預先攻打美國。[19] 日本參謀仲認為要打埋菲律賓。橙色戰爭計劃預計美國要40,000個精銳去守住菲律賓，但麥克阿瑟認為要用多十倍士兵，所以呢個計劃從來都冇實施過。1941年，美國參謀就預咗一旦打仗，就棄守菲律賓。同年，海軍上將兼亞洲艦隊司令Thomas C. Hart就收到呢個棄守命令。[20]1941年，日本趁法國淪陷，奪取法屬印度支那。美國卒之停運石油去日本，部分係因為美國嘅新措施，限制咗本地嘅石油消耗。[21] 因美國禁運，日本打算奪取荷屬東印度豐富嘅石油資源。[nb 2] 8月17號，羅斯福警告日本，如果「鄰國」遭受攻擊，美國會有措施準備反對。[23] 日本依家處於兩難局面，一係就撤出中國丟自己架，一係就喺歐洲嘅東南亞殖民地嗰度搶新嘅戰略物資。[未記出處或冇根據]
日美兩國喺1941年談判，試圖修補關係。日本提出條件，話會同中國國民政府議和，然後撤出中國大部份地區同埋印度支那。而且日本仲話會用新嘅方式去睇三國同盟，話如果其他國家同日本互利互惠，就會約束自己嘅貿易歧視行為。呢啲提案都被華府拒絕。時任首相近衛文麿話要見羅斯福，但對方就話要傾掂先至見。[24] 美國駐日大使多次同羅斯福講同近衛見面，警告佢話只有呢個做法先可以保住想和解嘅近衛政府，先可以維持太平洋和平，[25] 但都係冇見到。日本軍部拒絕近衛文麿嘅撤退命令之後，一個月內閣就倒台。[26]
日本最後嘅提議喺11月20號提出，話如果美國、英國、荷蘭供應一百萬加侖飛機油、撤銷制裁同埋唔再支援中國嘅話，日本就撤出南印度支那，而且唔會攻打東南亞。[27][26] 美國喺11月26號（即日本嘅27號）反建議，即係Hull嘅備忘錄，要求日本無條件撤出中國，仲要同太平洋各勢力簽定互不侵犯協議。日本時間嘅26號，亦即係條件送到日本嘅前一日，日本派遣嘅部隊已經出航，駛去珍珠港。[未記出處或冇根據]
軍略
目的
戰爭經過
潛水艇
日本宣戰
第一波攻擊
第二波攻擊
美軍傷亡同損失
日軍損失
未有發生嘅第三波攻擊
損失艦艇
打撈
報導
事後發展
你好島事件
戰略含意
陰謀論
流行文化
睇埋
注
參考
出面網頁
{{citation}}: CS1 maint: ref duplicates default (link)