原型理論
原型理論（粵拼：jyun4 jing4 lei5 leon6；英文：Prototype theory）係語言學同其他認知科學領域講到嘅一個概念，主張人腦決定「呢件物件，係咪屬於 XX 呢個類別」嗰陣，靠嘅唔係精確嘅定義，而係睇件物件「有幾似心目中 XX 嘅原型」[1]。
原型理論會作出一個預測：是但攞一件物件，人腦會對「呢件物件有幾似典型嘅 XX 類物件」作出某啲判斷，雖然唔同個體做嘅判斷可能會有啲唔同；有心理學家就嘗試喺 1971 年嗰陣做實驗，驗證呢套諗法，（簡化講）例如叫啲人諗傢俬嘅例子嗰時，佢哋硬係比較大機率會諗起梳化，多過會諗起衣櫃—「梳化喺啲人心目中係比較典型嘅傢俬」。而有好多語言學家就攞住呢個概念，主張人對腦入面嗰啲字詞嘅概念，係靠住對每隻字詞都畀返個「典型例子」形成嘅。
認知心理學方面嘅知識，會幫到讀者理解篇
基礎概念
原型理論嘅諗頭始於 1970 年代嘅認知科學，例如當時有心理學家就噉講（以下段嘢經過咗重述）[2][3]：
| 「 | 」 |
喺原型理論當中，一個人腦裏面會裝住一大拃類別。對於每一個類別，佢都可以搵一隻字詞嚟指個類別，而當佢要決定「眼前呢件物件，屬唔屬 XX 類別」嗰時，靠嘅唔係「記住 XX 嗰拃定義上有嘅特徵」得知件物件算唔算係 XX，而係個腦入面會對每個類別都畀返個「典型例子」—呢啲噉嘅「典型例子」就係所謂嘅原型[歐 2]，再比較吓眼前件物件有幾似個原型，有咁上下似嘅話眼前物件就算係屬於 XX [4]。
出名類別
動物物種
原型理論相關嘅文獻成日都會用「人腦點樣將唔同嘅動物分類」嚟做例子。首先，假設觀察者並唔係生物學家，唔識點樣睇遺傳特徵嚟將動物分類。
而家觀察者要思考雀鳥呢一隻字詞[5][6]。人腦能夠理解一種比較「理性」嘅諗嘢方法，就係個腦記住一拃「一件物件要算係雀鳥，所需要達致嘅條件」，呢啲條件可能包括[註 2]：
呀噉。一個噉諗嘢嘅人腦攞住一件物件，會客觀噉檢驗件物件係咪合乎晒呢啲條件，而且對於每件合乎晒啲條件嘅嘢—包括天鵝、烏鴉、火雞、企鵝等—全部都一視同仁。但現實並唔係噉：研究表明，啲人係就係有能力理解點樣客觀噉將一件物件分類做雀鳥，但佢哋一見到雀鳥或者雀仔等嘅字眼嗰陣，會即時聯想起曉飛呢樣嘢[註 3]，而如果有件物件唔具有呢樣特徵、但的確屬於雀鳥嘅（例如企鵝），啲人對於件物件嘅反應會稍為慢咗啲，而啲人對於有呢樣特徵又屬於雀鳥嘅物件（例如天鵝）反應硬係會快些少。一般認為，噉係反映咗人腦當中有個雀鳥嘅原型，而呢個原型係具有曉飛呢樣特徵嘅[註 4]。
就算將雀鳥換做第啲動物分類，上述講嘅嘢都仲會成立。
顏色判斷
原型理論嘅另一個出名例子係人腦對色彩嘅命名。好似紅或者黃等描述顏色嘅字詞，查實有高度嘅彈性[6]。首先好明顯嘅係，世上嘅主流語言都會有一系列嘅字詞嚟指唔同嘅顏色，例如粵語有
等嘅字詞，彷彿講到好似唔同色之間有明確分界噉。但係實證嘅心理實驗表明咗，唔同顏色之間根本冇明確嘅類別可以分到—由下圖嘅顏色輪最「紅」嗰笪抽一隻色嚟睇，多數人都會將攞咗出嚟嗰隻色描述做紅，但如果由最「紅」嗰笪同最「紫」嗰笪中間攞一隻色嚟睇，就會出現
- 「Err... 呢隻色係紅？或者可能係紫？」
- 50% 嘅人話隻色係紅，另外嗰 50% 嘅就話隻色係紫。
噉嘅情況。「色類」之間冇明確嘅分界線，只有「幾似心目中典型嘅紅色」或者「幾似心目中典型嘅紫色」等嘅判斷[7]。
