向西聞記

《向西聞記》（英文：Hong Kong West Side Stories）係由OTT平台hmvod製作嘅香港電視劇，由鄧健泓、林雪、張繼聰、王宗堯、張建聲、胡杏兒、白健恩、陳穎欣、張沛樂、陳安立、趙永洪、李美琪、趙善恒、廖子妤、徐浩昌、李尚正、岑珈其、蔡明思、石詠莉主演，吳兆麟執導。

套劇改編自網絡作家「向西村上春樹」嘅小說，由9個單元故仔組成，總共12集，每集約30分鐘。套戲頭一個單元長2集嘅《畜牲傳心師》喺2018年3月8號喺hmvod上架，其餘單元要到2019年4月18號先至上架，而同年4月30號就喺netflix全套上架。香港免費電視頻道ViuTV亦買咗呢套劇，安排喺2020年2月12號到2月28號逢禮拜一到五晚22:00－22:30播出，電視版有過濾粗口，而網上重溫就係有粗口嘅「足本版」。