波蘭第二共和國

喺1795年，普魯士、俄羅斯帝國、同埋奧地利帝國一齊第三次瓜分波蘭，波蘭完全滅國。到喺一次大戰之後，呢3個帝國都全部滅亡，波蘭喺《凡爾賽條約》成功復國。

喺冇耐之後，波蘇戰爭爆發，波蘭成功打贏蘇聯，維持到佢嘅獨立。喺1921年簽嘅《里加條約》，波蘭嘅邊界肯定咗：東面係蘇聯、西面同北面係威瑪共和國、而南面就係捷克斯洛伐克。波蘭經過波蘭走廊（英文：Polish Corridor）能夠出去波羅的海。

喺1920年代初，波蘭嘅動蕩非常之大，無論係政治、經濟、社會、定係外交都出現咗好多問題。喺政治方面，好多官員參與咗貪污，但係政府又冇足夠經驗去處理佢哋，所以令普羅大眾都唔信政府同官員^[5]。喺1926年，Józef Piłsudski 發動政變，推翻咗民主政府，成為獨裁者。最終，波蘭民主嘅失敗，都係因為政黨唔肯互相信任同合作，搞到一事無成^[6][7]。

到1930年代尾，納粹德國嘅攻擊性跡象明顯加劇，包括喺慕尼黑協定吞并蘇台德地區。到1939年9月1號，納粹德國正式發動波蘭戰役，而蘇聯喺17號亦同樣入侵波蘭，二次大戰正式開始。喺一個月後，波蘭滅國，成為打仗期間嘅流亡政府。

波蘭獨立之後嘅經濟同樣非常之頭痛，因為政府為咗減輕私有化嘅煩惱，決定將好多大型嘅企業都國有化，搞到私人投資係全歐洲最少嘅國家。到1929年經濟大蕭條之後，波蘭嘅經濟就更加一鑊粥，其中國内嘅農民收入跌咗超過50%，表明經濟嘅唔穩定^[8][9]。

喺1938年，波蘭係歐洲喺人口上第六大嘅國家。根據人口普查，到1939年戰前有大約3,510萬人。波蘭當時有接近1/3係少數民族：13.9% 烏克蘭人、10% 阿什肯納茲猶太人、3.1% 白俄羅斯人等等，所以出現好多種族之間嘅衝突^[10][11]。

喺國會入面，大家亦唔能夠認定未來嘅去向：有啲希望波蘭嘅人口全部同化入波蘭文化，但係有其他就認為波蘭應該繼續波蘭立陶宛嘅腳步而歡迎一個多元化嘅社會。

到1935年，波蘭同納粹德國一樣，開始出現反猶情緒，對猶太人嘅生意加咗好多限制^{[12][13][14][15]}。

• 瓜分波蘭
• 捷克斯洛伐克