阿什肯納茲猶太人
阿什肯納茲猶太人 (希伯來文：יְהוּדֵי אַשְׁכְּנַז，羅馬拼音：Yehudei Ashkenaz; 依地文：אַשכּנזישע ייִדן) 係歷史上主要喺歐洲度住嘅猶太人。佢哋傳統會講依地話[1]，不過自從20世紀以嚟開始講返希伯來話。佢哋自從中世紀因爲受逼迫嘅緣故，逐漸遷徙去北歐同東歐，特別係波蘭[2][3]。
經過長時間，阿什肯納茲猶太人因應住喺歐洲嘅傳統變化，而不斷翻新佢哋對猶太教嘅認知[4]。喺18同19世紀期間，因爲當時喺歐洲嘅民族主義興旺，所以令唔少喺德國嘅猶太人開始由講依地話轉做講德文，改變咗當時所認識嘅猶太身份[5]。喺佢哋過去幾百年，佢哋對歐洲有唔少嘅貢獻，包括哲學、文學、藝術、音樂、科學等等[6][7][8][9]。
喺11世紀，阿什肯納茲猶太人只係全球嘅猶太人口嘅3%，到1930年，已經升到成爲全球92%嘅猶太人口[10]。經過猶太人大屠殺之後，阿什肯納茲猶太人嘅人口大減[11][12]。喺1933年，全世界嘅猶太人口係大約1530萬[13]。以色列人口專家 Sergio Della Pergola 默示阿什肯納茲猶太人喺2000年，包含咗全球猶太人口嘅大約 65-70% [14]，不過有其他嚟源就認爲呢個數據係超過 75% [15] 截至2013年，阿什肯納茲猶太人嘅總人口係大約1000萬[16]至1120萬[17]人之間。
群體遺傳學發現阿什肯納茲猶太人主要有嚟自黎凡特同歐洲嘅血統，不過每個嘅比重就有唔同嘅結論。有啲重視佢哋母系血統嘅歐洲成分，而其他就重視父系血統嘅中東成分[18][19][20][21][22]。