預防醫學
預防醫學（粵拼：jyu6 fong4 ji1 hok6；英文：Preventive medicine），又或者叫預防式醫療，係指集中於防止疾病發生嘅醫療工作。舉個簡單例子，已知癡肥會提升好多種嚴重疾病嘅風險，所以體重管理可以減少疾病發生嘅機率，因而算係預防醫學嘅一種形式。
預防醫學覆蓋嘅範疇好廣，可以係由一個細路出世嗰陣就採取啲措施，減低佢第時患嚴重疾病嘅風險（原始預防），亦包括定期幫人做檢查，確保啲嚴重疾病可以及時發現（二級預防），仲包埋保護啲已經出現咗病徵嘅病人，盡力防止佢哋身體永久受損（三級預防）。响廿一世紀初，預防醫學嘅研究者仲開始思考要點樣做四級預防—即係防範病人受不必要嘅醫療干預。
定位
肥得滯可以引致好多嚴重疾病，所以鼓勵人做運動防止過肥可以有效預防好多疾病。
預防醫學顧名思義，就係指重視預防嘅醫學：廿世紀嘅醫護人員，好多時都係淨係側重於醫病，即係類似噉嘅思考方式：
- 「呢位病人有呢隻病？用呢隻療法啦。」
- 「病好返晒嗱？出得院喇。下次再有咩唔舒服嗰陣再嚟啦。」
相比之下，預防醫學就幾唔同。預防醫學重點係想防止問題出現[1][2]，包括解答以下呢啲問題—
... 呀噉。例如牙科噉：如果有位病人牙痛，牙醫固然要幫佢睇吓問題喺邊並且解決個問題；不過好多牙科方面嘅工作者仲會採取預防式嘅做法，向政府提出一啲計劃，例如提倡立法限制某啲高糖份食品嘅銷售，或者係要求政府確保食水會落氟等等，即係喺問題出現前，就做啲嘢減低問題出現嘅機率。一言記之曰[3]—
| 「 | 預防勝於治療。 | 」 |
等級
預防醫學可以分做幾個「等級」，大致上可以想像成要幾早開始採取行動防病[4][5]：
| 級別 | 定義 |
|---|---|
| 原始預防 [歐 1] | 呢類做法可以話係最早郁手嘅預防，喺一個細路未出世或者出世冇耐嗰時就介入。首先，事實表明有唔少致病嘅危險因子都係喺發育期間形成嘅，絕大多數 |
| 初級預防 [歐 2] | 排除引起疾病嘅物體，或者做啲嘢嚟提升啲人對疾病嘅抵抗能力，從而阻止疾病出現。例子有安排啲人接種疫苗，又或者係教人建立健康嘅生活習慣，幫佢哋做到飲食均衡同埋多啲運動，kip1 住佢哋嘅身體狀態良好[8]。 |
| 二級預防 [歐 3] | 盡力喺病徵出現之前，就達致成功探測到有問題，並且採取適當嘅行動。呢點喺癌症相關嘅研究上廣受討論—事實表明咗，好多癌症只要及時發現都係唔難醫嘅，問題係好多時發現到有癌症嗰時已經為時已晚。詳情可以睇睇癌症篩查，講到點樣定期幫人以驗血等嘅方法 cek1 吓佢哋有冇癌症[8]。 |
| 三級預防 [歐 4] | 個病人已經患咗病，而且病徵已經出現晒。三級預防講嘅係要將疾病帶嚟嘅損害—例如係永久傷殘呀噉—盡量減到有咁低得咁低[8]。 |
| 四級預防 [歐 5] | 「四級預防，採取嚟係想保護病人免受弊大於利嘅醫療干預侵害。」[5]:p 107 舉例說明，雖然話二級預防係重要，但任何醫療上用嘅測試，都有一定機率會出現假陽性—即係話病人明明冇病，個測試就話佢有病（呢個機率可能好細，但依然大過 0），而出現假陽性往往就搞到病人要接受好多不必要嘅治療，損害病人嘅生活質素之餘又嘥晒啲醫療資源，而且仲有研究指，病人成日迎住自己有病都會影響佢哋情緒。由此可見，醫療干預喺某啲情況下可以對病人造成不良影響。四級預防做嘅，就係想避免呢種情況[9]。 |
課題
預防式醫療呢家嘢，講就易做就難：一個社會嘅人梗會有咁上下個體差異，例如是但搵隻物質，都可能會有某啲個體係對隻物質過敏嘅，所以「食水冚唪唥要落呢隻物質」噉嘅做法可能會對某啲人造成危害；健康問題亦可能會造成污名，例如想像家陣要教育防範性病，周圍同人講「呢類呢類人零舍大機會有性病」可以引致呢類人受污名化同排擠；除此之外事實亦表明，同某個人講話佢大機會會有某隻嚴重嘅病，好可能會搞到佢情緒受困擾。因為呢啲緣故，預防式醫療往往要多個界別合作做先得[3]。
體重管理
體重管理[歐 6]係指一系列技巧，用嚟幫人維持健康體重（唔係太輕又唔係太重）嘅。响廿一世紀初，癡肥[歐 7]嘅情況日趨普遍，例如响 2020 至 2022 年嘅香港，估計 15 至 84 歲嘅大人當中有成 32.6% 嘅都屬於超重，BMI 高過 25 [10]，而肥胖會提升好多種嚴重疾病—例如心臟病、高血壓同中風[11]呀噉－嘅機率。因為噉，醫療工作者日益重視體重管理嘅問題[12]。
喺呢方面，一種常見嘅研究係配合營銷同行為經濟學，吸引人食多啲生果同蔬菜，同時又食少啲垃圾食物。例如行為科學研究已經發現，人類揀嘢食嗰陣好多時都係按照啲相對簡單嘅法則嚟行事嘅，例如係會攞最就手嘅嘢食呀噉，於是有研究者試過對環境做一啲操作，例如將啲健康食品擺喺近客人嘅地方，同時又將啲垃圾食物擺喺離客人遠嘅地方，發現噉嘅操作的確能夠提升啲人揀健康食品嚟食嘅機率[13][14]。
疾病篩檢
疾病篩檢[歐 8]係一系列嘅技術，旨在想搵出前所未知嘅健康問題或者風險因素，簡單嘅可以係畀問卷人填，問佢哋有冇某啲症狀或者有冇定期做篩檢呀噉。事實表明，有好多病只要發現得早，都好易醫而且唔會有咩手尾，例如多種嘅癌症都係噉—及早發現好大機會（例如 80-90%）可以生還，而等到有症狀出現嗰時往往已經為時已晚。因為噉，預防醫學界相當重視疾病篩檢嘅問題[15]。
例如唔少研究者都有喺度研究有咩因素會左右一個人肯唔肯做篩檢。例如响 2020 年代初嘅土耳其，估計得嗰 20 至 30% 嘅大人有好好哋定期噉做結腸癌篩檢，於是研究者就做統計分析，睇吓性別、年齡同社經地位等嘅因素會點樣影響一個人有冇好好噉做篩檢，想理解點解某啲人會唔肯做篩檢[16]。再進階啲嘅研究，仲可能會利用營銷學知識，想透過巧妙噉設計廣告嚟鼓勵啲人做篩檢[17]。
睇埋
| 「 | 」 | |
——出自上古醫書《黃帝內經》 | ||
註釋
文獻
- Clarke, E. A. (1974). What is preventive medicine?. Canadian Family Physician, 20(11), 65.
- Livingston, G., Sommerlad, A., Orgeta, V., Costafreda, S. G., Huntley, J., Ames, D., ... & Mukadam, N. (2017). Dementia prevention, intervention, and care. The lancet, 390(10113), 2673-2734.
- Martins, C., Godycki-Cwirko, M., Heleno, B., & Brodersen, J. (2018). Quaternary prevention: reviewing the concept: Quaternary prevention aims to protect patients from medical harm. European Journal of General Practice, 24(1), 106-111 （英文），呢篇學術文探討四級預防嘅概念，亦有簡短噉提咗初級、二級同三級預防。
- Toril, P., Reales, J. M., & Ballesteros, S. (2014). Video game training enhances cognition of older adults: a meta-analytic study. Psychology and aging, 29(3), 706，有講到用打機嚟提升老人家嘅認知能力，防止佢哋出現痴呆嘅問題。
歐詞
疏士
外拎
- 香港預防醫學協進會 （香港繁體）
- Preventive Medicine, Science Direct （英文），呢篇文簡介預防醫學。