亞洲電視

亞洲電視原本叫「麗的映聲」，英文簡稱（RTV），1957年4月，港英政府向麗的呼聲發出執照，准許開辦有線電視^[8]。同年5月29號，麗的呼聲（香港）有限公司以400萬元資本創辦嘅麗的電視台正式成立，麗的映聲不但係香港第一間電視台，更係全球華人地區第一間電視台，亦係英國所有海外殖民地中嘅首間電視台，甚至係遠東首間嘅有線電視台^[9]。早期以收費有線廣播形式經營。成立之初，「麗的映聲」只有一條黑白嘅英文頻道，每日播四個鐘。1963年9月30號，麗的映聲增設中文台，以廣東話為主要廣播語言。1957年，麗的映聲首次播出香港電視史上第一部直播電視劇《俠盜羅笨漢（中文：俠盜羅笨漢）》^[10]。初期節目內容包括新聞同體育消息，首映當日嘅電視節目由香港時間晚上7點正至9點正，有晚上7點正：「開幕儀式」、晚上7點40分：「晚間新聞（中文：晚間新聞）、天氣預報」、晚上7點50分：「香港教育」、晚上8點正：「香港電影」、晚上8點55分：「最後新聞（中文：晚間新聞）、天氣預報」^[11]。麗的映聲第一代台徽採用放射16道光芒嘅太陽，象徵電視廣播，輻射全港。1973年4月攞到無線廣播牌照，開始免費廣播，改名做「麗的電視」（英文：Rediffusion Television，簡稱麗的或者RTV）。1982年9月24號改名「亞洲電視」。

公司曾經多次易手，包括1981年3月嘅三大澳洲財團：大衛森、亨利鍾斯、CRA有限公司；1982年6月邱德根旗下遠東集團；1988年林百欣家族嘅麗新集團同埋鄭裕彤家族嘅新世界集團；1998年封小平（中文：封小平）、劉長樂（「龍維有限公司」、「聯旺有限公司」）；2002年VMH控股有限公司（Vital Media Holding & Limited）。2006年5月12號晚亞視突然宣佈^[12]，引入中信集團（中文：中信集團）旗下「中信國安集團公司」購買發行嘅「新股」同埋陳永棋嘅「舊股」，變相入股亞視22.22%權益，並且派兩名代表加入董事局。交易完成後陳永棋同埋劉長樂仍然係大股東，兩人合共持有亞視超過七成權益。陳永棋接受訪問嘅時候話有意將亞視上市但係未有時間表。

2009年，亞視原最大股東查懋聲引入旺中集團入主亞視，蔡衍明成為亞視最大股東，但因為佢唔係香港永久居民，所以法例規定唔可以有控股權，董事會表決權上成為少數。2010年3月，查懋聲引入中國商人王征入股亞視，藉以抗衡蔡衍明。王征嘅改革比蔡衍明更出格，解散製作部，王征堂弟盛品儒成為亞視執行董事，操控亞視，製作比之前偏離香港觀眾口味，惹嚟大量投訴。

亞洲電視現有免費電視牌照喺2015年11月30號屆滿，行政長官會同行政會議於2015年4月1號宣佈唔續牌畀亞洲電視。亞視可以提供免費電視服務多12個月，成為香港歷史上首間唔獲續牌嘅電視台。亞洲電視最多可以繼續提供免費電視服務直至2016年4月1號。而亞洲電視沿用嘅模擬廣播頻譜將會由香港電台繼承沿用^[13]，而數碼廣播頻譜將由通訊事務管理局重新指配畀其他免費電視持牌機構，現時其中一部分頻譜已經指配畀已經獲發免費電視牌照嘅香港電視娛樂（ViuTV）。

亞洲電視被宣佈冇得續牌之後，出現過遲出糧嘅情況。2016年2月5號，大部份員工仍然未收到2015年12月同2016年1月嘅人工，當中部份員工決定根據《僱傭條例》嘅自動遣散條款離職，營運總裁馬熙亦喺當晚即時辭職。2016年2月6號開始亞洲電視停止製作直播新聞報道，違反本地免費電視服務牌照嘅規定。2016年2月20號開始，亞視新聞部恢復製作本港台嘅《六點鐘新聞》同《夜間新聞》。

2016年3月3號，亞視臨時清盤人德勤喺夜晚召開記者會，話亞視同新投資者司榮彬未能達成協議，對方到傍晚死線之前重未能夠有現金到手，決定喺第二朝遣散全部員工，令到亞視提早喺3月4號停播，但係具體停播時間要同工程部商議^[14]。3月4號，亞視股東11點半喺亞視舉行記者會，指因為驚德勤粗暴處理清盤，冇信心放錢喺德勤指定嘅戶口，現場一直有人保顧住一個喼，喼入面有500萬現金，同埋500萬支票力證有資金可以營運落去，直至4月1號廣播結束為止^[15]。之後又傳德勤預計喺3月4號傍晚6點停播，亦有員工形容已經對亞視「心死」，就算亞視請返佢，都唔會繼續做落去，又話若果投資者有錢，點解唔出糧畀員工先^[16]。3月4號最終並未停播，如常喺6點繼續播新聞。2016年3月24號，亞洲電視臨時清盤人向亞視餘下嘅160名員工派發解僱信，信入面列明各員工喺4月1號之後，唔再續約，意味亞視將會喺4月2號停止運作^[17]。

2016年4月1號朝早，亞視高級節目執行主任程啟光話夜晚11點59分07秒開始到12點正，亞視會播一張卡同觀眾告別後先至停播^[18]，不過最終張卡都「走數」無播到，準時12點正無晒畫面，成為亞視留畀香港觀眾嘅最後一個愚人節整蠱。

時間	地點
	香港	廣東
2016年4月2號00:00	喺羅霖講完「特別係經濟獨立」後變藍屏，再變雪花（模擬信號）或黑屏（數碼信號）。	未到羅霖講到「特別係經濟獨立」時變藍底白字嘅「節目信號中斷」字樣。部分城市嘅市線，區有線屬下重喺度插播緊廣告。
2016年4月2號00:07	模擬信號： 出現「歡迎收看港台電視31A」嘅字樣，隨後第一句聽到嘅係主持蘇敬恆講「各位觀眾，你而家睇緊嘅係港台電視31同31A嘅同步直播，睇緊模擬頻道嘅觀眾朋友，你而家睇緊嘅係港台電視31A。」 數碼信號： 部分電視畫面跳轉到翡翠台或出現「本港台不存在，要刪除嗎？」呢堆字樣，隨後嘅數碼頻道一直都冇信號。	部分市線（尤其係廣州同深圳）重喺度插播緊當地廣告，之後出現「節目信號中斷」字樣，但有部分廣東居民話「節目信號中斷」字樣嘅畫面整得唔好，可以睇到港台電視31A接通嘅界面同聽到港台電視31A接通嘅聲，但過咗10分鐘後消失嗮。 廣州有線珠江數碼（珠江寬頻、甜果時光）屬下嘅本港台（左）同國際台（右），停播後無耐出現嘅畫面。
2016年4月2號00:20	模擬信號：港台電視31A正常播出 數碼信號：一直黑屏幕或冇信號	重係保持出現藍底白字嘅「節目信號中斷」界面，部分市線變成測色板或其它電視台嘅節目。亦有好多廣東當地觀眾打電話到廣東省廣播電視廳（廣東電視台總部）話點解本港台或國際台會停播，但客服話好多人都唔知通訊事務管理局喺2015年4月1號宣佈咗「決定亞視唔再續牌」嘅消息。《明報》話有人喺facebook發文話廣東地區播出嘅亞視信號冇嗮，無線電視亦有報道到廣州地區嘅亞視冇嗮信號。
2016年4月3號		出現藍底帶「本港台和國際台由於牌照到期已停播」嘅白字畫面。其中本港台位以仿宋體形式出現，國際台以宋體等字體形式出現。
2016年4月15號	亞洲電視官網入唔到 港台電視31A保持正常播出 數碼信號重係一直黑屏幕	亞洲電視官網入唔到 部分城市或地區已經轉播其它電視台或直接變藍屏或刪台處理
2016年6月1號		重係維持純藍屏 部分城市或地區已經轉播其它電視台或刪台處理

亞視停播後，喺香港地區，模擬電視頻譜由香港電台即刻接手，旗下港台電視31A、港台電視33A響00點05分（UTC+8）已經開始有節目播，同日朝早6點半正式啟播；1.5條數碼電視頻譜嘅其中0.5條由香港電視娛樂即刻接手，旗下ViuTV頻道凌晨已經可以搜到台，4月6號朝早6點正式啟播。但香港以外嘅地區原先收到嘅亞視兩個頻道都出現咗唔同嘅變化：

以上啲頻道喺廣東有線、韶關有線、東莞有線、甜果時光都出現咗刪台處理。

2016年5月2號，電視台屬下嘅海外台都停播兼官網正式關閉。而衛星牌照亦係同年同月31號到期。

股權變動

亞洲電視冇喺香港上市，先後俾邱德根、鄭裕彤、林百欣同埋陳永棋等人控股營運。

2008年股權分佈

• 47.58% Alnery No.112 Limited: 股東係查懋聲、查懋德、費道宜、荷蘭銀行（中文：荷蘭銀行）香港。
• 10.75% Panfair Holding Limited: 汎泰集團，股東係查懋聲、查懋德。
• 26.85% Dragon Viceory Limited: 龍維公司股東係陳永棋同劉長樂等，係以前嘅大股東。
• 14.81% China Ligh Group Limited: 僑光集團嘅母公司係中國中信集團（中文：中國中信集團）。

2010年9月股權分佈

• 52.42% 黃炳均（中文：黃炳均）
• 47.58% Antenna Investment Limited
• 重要人物
  • 黃炳均（中文：黃炳均）（第一大股東）
  • 查懋聲（第二大股東）
  • 蔡衍明（第三大股東）
  • 盛品儒（執行董事）
  • 王征（執行董事高級顧問）

數碼頻道（2009年4月1號前播放）

• 亞洲電視新聞財經頻道
• 亞洲電視動感資訊頻道
• 亞洲電視魅力資訊頻道
• 亞洲電視文化資訊頻道
• 亞洲電視中央電視台中文國際頻道（中文：中央電視台中文國際頻道）
• 亞洲電視高清頻道

要知更多關於呢個題目嘅細節，睇睇亞視藝員部主要人員名單。

註

參考資料

• [1]，頭條日報，2010年9月11號
• 2002年06月13號，亞洲電視股權
• 大公報: 亞視數度易主，2008年查氏家族接手

• 亞洲電視節目一覽
• 亞洲電視劇集一覽

• 亞洲電視官方網頁
• Android流動應用程式
• iOS流動應用程式