龜苓膏
龜苓膏係中國廣西梧州特產，廣東、廣西一帶嘅傳統藥用嘢食。正統龜苓膏係用受保護動物金錢龜、土茯苓、甘草等中藥材製成凝固嘅膏狀，相傳係由清朝時太醫嚴綺文流傳出民間嘅宮廷秘方，據講有清熱解毒等功效。據講同治帝身患天花期間曾經食過龜苓膏，病情一度轉好，但慈禧太后因偏信巫醫，要同治帝停食龜苓膏，延誤病情，令佢一命嗚呼。
龜苓膏一般係黑色嘅膏狀，似凉粉，不過有較濃嘅中藥甘苦味道，食嗰陣可以加少少蜜糖。喺夏天，龜苓膏亦可以凍食。
現代嘅龜苓膏成品除咗喺涼茶舖、甜品店有得賣之外，喺超級市場都有罐裝賣，不過而家根據食品衛生標準生產嘅龜苓膏，由於生產廠家同調製口味嘅唔同，藥物成分亦同原始配方有唔同。現代嘅龜苓膏已經唔會有金錢龜嘅成分，連有冇廉價草龜龜板成分都無保證。香港海天堂龜苓膏專門店老闆曾經喺同佢大家組爭奪商標時，喺法院上話過龜苓膏處方根本就無任何龜嘅成分。
配方
功效作用
龜苓膏嘅藥效主要嚟自龜板同土茯苓。龜板含有豐富嘅骨膠原，以金錢龜最有效，但因為金錢龜係受保護動物，用佢整龜苓膏價錢貴而且犯法，因此而家大多數生產商嘅龜苓膏普遍用草龜同泥龜代替，甚至根本無龜嘅成分。草龜係素食動物，蛋白質同骨膠原較少，療效更弱[1]。
- 龜板，又叫龜甲，係烏龜嘅甲殼，性味甘、寒，有滋陰潛陽、補腎健骨、養血補心同止血嘅功效，可以用喺治療頭痛眩暈、盜汗遺精、手足震顫、腰膝酸軟、驚悸、失眠健忘、婦女崩漏同月經過多等。如果將龜板熬成固體膠塊，叫做龜板膠，佢嘅滋補力比龜板更強。由於龜板同龜板膠含有動物膠原、脂肪、角蛋白、18種氨基酸，同埋鈣、磷、鋅等多種微量元素，因此，佢哋能夠提高白細胞數量、增強免疫力，有補血、鎮靜、提高冠脈流量同提高耐缺氧能力等作用。
對於龜苓膏嚟講，淨係龜板同土茯苓重未夠，喺呢兩種主要原料嘅基礎上，加埋金銀花、蒲公英、菊花等清熱解毒、解暑、利濕嘅多味藥材先至更好噉起到滋陰、解毒、解暑、解瘡毒等作用。
總括嚟講，龜苓膏滋陰潤燥，降火除煩，清利濕熱，涼血解毒。用於正虛邪實、陰虛熱甚所致嘅虛煩、便秘、熱淋、白濁、癤腫、赤白帶下、皮膚搔癢、癤瘡紅腫等症。現代常用龜苓膏醫治多種口腔潰瘍、習慣性便秘、急慢性泌尿系感染、女性生殖系統炎症、一啲神經功能障礙等症。
食用禁忌
因爲龜苓膏可以促進血液循環而且屬於清涼解毒嘅嘢食，所以婦女喺月經期間同孕婦都唔適宜食，體質虛弱嘅人都唔適宜成日食。