Stade Chaban-Delmas

Die Stade Chaban-Delmas is 'n stadion in die Suidwes-Franse metropool Bordeaux wat tussen 1938 en 2015 veral as tuisveld vir die plaaslike sokkerspan Girondins des Bordeaux gedien het en sedert 2011 die rugbyspan Union Bordeaux Bègles huisves. Die stadion se naam is in 2001 gewysig; dit het vroeër bekend gestaan as Stade du Parc Lescure en dra tans die naam van die politikus Jacques Chaban-Delmas wat in die periode tussen 1947 en 1995 die amp van burgemeester van Bordeaux beklee het.

Stade Chaban-Delmas
Binnekant van die Stade Chaban-Delmas
Bynaam	Lescure
Volle naam	Stade Jacques Chaban-Delmas
Ligging	Bordeaux, Frankryk
Koördinate	44°49′45″N 0°35′52″W / 44.82917°N 0.59778°W / 44.82917; -0.59778 0°35′52″W / 44.82917°N 0.59778°W / 44.82917; -0.59778
Eienaar	Stad Bordeaux
Kapasiteit	34 694
Oppervlak	Gras
Konstruksie
Gebou	1930
Geopen	12 Junie 1938
Renovasie	1938, 1987, 1998, 2008
Uitgebrei	1935
Argitek	René Buthaud Jacques d'Welles Raoul Jourde
Huurders
FC Girondins de Bordeaux (1938–2015) Union Bordeaux Bègles (2011–hede)

Die aantal sitplekke is by die voorskrifte van internasionale wedstryde soos die FIFA Sokker-Wêreldbekertoernooi in 1998 aangepas en beloop tans 34 694. Sedert die somer van 2007 beskik die stadion oor twee reuseskerms met 'n oppervlak van 37 vierkante meter elk wat ter geleentheid van die Rugbywêreldbeker 2007 geïnstalleer is.

Die stadion is in 1935 in die vorm van 'n fietssportstadium (Frans: stade vélodrome) opgerig, en in 1938 is wedstryde van die FIFA Sokker-Wêreldbekertoernooi hier gehou. Dit was die eerste stadion ter wêreld wat oor volledig oordekte tribunes beskik het sonder enige pilaar wat die sig van die toeskouers belemmer het. Vanweë sy klassifisering as 'n historiese monument moet 'n aantal probleme by die stadion se herstel oorkom word. Die stadiondak beskerm nog die sitplekke wat ná die jaar 1984 op die ou fietsrenbaan opgerig is, nog die voormalige draaie.

Die tonnel wat die spelers se kleedkamers met die speelveld verbind, is met byna 120 meter die langste in Europa.

Op 19 Julie 2011 het die FC Girondins de Bordeaux sy plane bekend gemaak om 'n nuwe stadion opterig, geleë in Bordeaux-Lac en met plek vir 42 114 toeskouers. Die konstruksie aan die Nouveau Stade de Bordeaux het in 2013 begin en in April 2015 geëindig.