D Freihäitsstatue z Nöi York

Dä Artikel isch über d Freihäitsstatue z Nöi York. Für anderi Freihäitsstatue lueg doo.

D Freihäitsstatue z Nöi York (änglisch Statue of Liberty, offiziell Liberty Enlightening the World, au Lady Liberty; franzöösisch La Liberté éclairant le monde) isch e neoklassizistischi Kolossalstatue, wo vom Frédéric Auguste Bartholdi gmacht worde isch. Si stoot uf Liberty Island im Haafe vo Nöi York und isch am 28. Oktober 1886 iigweiht worde. Si isch e Gschänk vom französische Volk an die Veräinigte Staate gsi. D Statue isch sit 1924 Däil vom Statue of Liberty National Monument und sit 1984 isch si as Wältkulturerb vo dr UNESCO klassifiziert.

D Statue stellt d Libertas dar, die römischi Göttin vo dr Freihäit. D Figur het Roobe aa, stoot uf eme massive Sockel und hebt in dr rächte Hand e vergoldeti Fackle hoch in d Luft. In dr lingge Hand het si e Tabula ansata mit em Datum vo dr amerikanische Unabhängigkäitserklärig. Vor iire Füess lit e verbrochnigi Chetti. D Statue gältet as Sümbol vo dr Freihäit und isch äins vo de bekanntiste Sümbol vo de Veräinigte Staate. D Figur isch 46,05 Meter hooch und die ganz Hööchi vom Monumänt isch 92,99 Meter. Si ghört zu de höggste Statue uf dr Wält, bis 1959 isch si die höggsti gsi.