Mailand–Sanremo

D Streckefierig vu Mailand uf Sanremo änderet sich vu Johr zue Johr nume wenig. Im Gegesatz zue z. B. Paris–Roubaix, wu 80 Kilometer nerdli vu Paris z Compiègne aafangt, fangt Mailand–Sanremo datsächli z Mailand aa, uf dr Piazza Castello. Derno goht d Strecki iber Binasco, Pavia, Voghera, Tortona, Novi Ligure, Ovada un dr Turchino-Bass – mit 588 Meter dr hegscht Punkt vu dr Ruute – un chunnt bi Genua an d Mittelmeerkischte. Spektakulär sin vor allem d Passasche dernoo: si fiere zem greschte Deil uf dr historische Via Aurelia diräkt an dr italienische Riviera lang.

S Ränne, wu iber wyti Deil fascht ganz flach isch, het sich bis vor e baar Johr vilmol an e baar churze Aastiig churz vor em Änd entschide, vor allem am Aastiig no Cipressa (rund 20 Kilometer vor em Ziiluf 240 Meter Hechi gläge) un am Aastiig no Poggio di Sanremo (rund segs Kilometer vor em Ziil uf 162 Meter Hechi gläge). Im Radsport sait mer vilmol au churz d Cipressa un dr Poggio. Derzue het s no dr Capo Mele (65 m), dr Capo Cervo (77 m) un dr Capo Berta (130 m). In dr letschte Johr hän die Aastiig, wu „Capi“ gnännt wäre, aber nume no sälte zuen ere Selektion gfiert un d Entscheidig isch zmeischt in eme Massespringt uusdrait wore. Des zeigt sich au in dr Siigerlischt, wu zletscht vu Sprinter wie Erik Zabel, Mario Cipollini, Oscar Freire, Alessandro Petacchi un Mark Cavendish dominiert woren isch.

Di meischt Siig bi dr „Classicissima“ het dr belgisch „Kannibal“ Eddy Merckx gschafft. Är het in elf Johr zwische 1966 un 1976 insgsamt sibe Mol gwunne. Hinter em Costante Girardengo (segs Siig) lyt zämme mit em Gino Bartali dr dytsch Fahrer Erik Zabel uf Platz 3 vu dr ebige Ranglischt. Dr Zabel het vu 1997 bis 2001 vier Mol z Sanremo gwunne, noch em Rudi Altig 1968 dr zweet dytsch Fahrer, wu des Ränne gwunne het. 2013 het dr Gerald Ciolek as dritte Dytsche d Classicissima gwunne un 2015 dr John Degenkolb as vierte.

Schwyzer Siiger het s zweimol gee: anne 1987 (Eric Mächler) un 2008 (Fabian Cancellara).

•  Commons: Mailand–Sanremo – Sammlig vo Multimediadateie
• La Gazzetta dello Sport: Milano–Sanremo

Dä Artikel basiert uff ere fräie Übersetzig vu dere Version vum Artikel „Mailand–Sanremo“ vu de dütsche Wikipedia. E Liste vu de Autore un Versione isch do z finde.