Paris–Nizza

Paris–Nizza, frz. Paris–Nice, au Ränne zue dr Sunne gnännt, giltet as di erscht wichtig Rundfahrt vu dr Radsport-Saison un het vu 2005 bis 2007 zue dr UCI ProTour ghert, ere Serie vu dr wichtigschte Radränne im Johr.

Paris–Nizza, frz. Paris–Nice
Dr Jerome Pineau bi Paris–Nizza 2008
Uusdragigsland	Frankreich Frankriich
Uusdragigszytruum	März
Ränntyp	Etapperänne
Erschti Uflag	1933
Erschte Siiger	Flagge Belgiens Alphonse Schepers
Rekordsiiger	Flagge Irlands Sean Kelly (7 Siig)

S eiwichig Etapperänne wird im März, zytli parallel zum italienische Ränne Tirreno–Adriatico, im Side vu Frankryych uusdrait. Grindet woren isch s vum Albert Lejeune, em Direktor vu dr Zytschrift „Petit Journal“ un het anne 1933 s erscht Mol stattgfunde. Hite wird s Ränne vu dr Amaury Sport Organisation veraastaltet, wu au d Tour de France organisiert. In Analogii zue dr Tour de France wird dr Erscht im Gsamtklassement mit em Geele Trikot (maillot jaune) uuszeichnet, dr Erscht in dr Pinktwärtig mit em Griene Trikot (maillot vert) un dr Erscht in dr Bärgwärtig mit em punktete Bärgtrikot (maillot à pois). Dr bescht Noowugsfahre derf s Wyss Trikot (maillot blanc) drage.

Mittlerwyyli fangt s nimi z Paris aa, derfir im Pariser Vorort Issy-les-Moulineaux. S Profil vum Etapperänne isch fir dr frie Zytpunkt in dr Saison relativ schwär, wel s e baar Bärgetappe din mit Aastiig vu dr erschte Kategorii. Eini vu dr letschte Etappe isch gängigerwyys e Bärg-Zytfahre in dr Gegnig um Nizza.

Dr erfolgryychscht Fahrer isch dr Ire Sean Kelly mit sibe Siig hinterenander (1982-1988). Siiger us Dytschland het s fimfmol gee: Rolf Wolfshohl 1968, Andreas Klöden 2000, Jörg Jaksche 2004, Tony Martin 2011, Maximilian Schachmann 2020. Schwyzer Siiger sin dr Tony Rominger (1991, 1994) un dr Alex Zülle (1993).