Anne Heche

Empezó la so carrera como actriz a los 12 años nun café teatru pa contribuyir a la subsistencia familiar. Tres años más tarde foi afayada por un cazatalentos que-y ufiertó participar na serie As the world turns, daqué qu'ella refugó pa siguir ayudando al so famila. A los 17 años, diplomada nel institutu, treslladóse a Nueva York p'actuar na serie Another World, nel papel de les ximielgues Vicki Hudson Frame y Marley McKinnon. La so actuación mientres cuatro años valió-y un Daytime Emmy Award en 1991.

Esi mesmu añu abandonó la serie pa empezar la so carrera cinematográfica. Dempués d'actuar nuna serie de películes ensin mayor relevancia, llegaron Walking and Talking (1996) y The Juror (1996), xunto a Demi Moore.

La so actuación como esposa de Johnny Depp en Donnie Brasco (1997) valió-y delles crítiques positives, como tamién les sos actuaciones en Volcano (1997), xunto a Tommy Lee Jones, y Wag the Dog (1997) xunto a Robert De Niro y Dustin Hoffman.

Onde más se dio a conocer foi na comedia romántica Six Days, Seven Nights (1998 dirixida por Ivan Reitman, xunto a Harrison Ford. Tamién intervieno en Psycho (1998), el remake d'una de les obres más conocíes d'Alfred Hitchcock, Psycho (1960). Nesta película interpreta a Marion Crane, papel qu'antaño lo interpretó Janet Leigh.

Foi pareya mientres dos años de Steve Martin, y darréu del músicu Lindsey Buckingham, de Fleetwood Mac.

En 1997, arriendes de la so participación en The Ellen DeGeneres Show, entabló una rellación cola comediante Ellen DeGeneres. La pareya, qu'inclusive dixo que si en Vermont fueren llegales les bodes homosexuales casaríense, rompió tres años más tarde y Heche empecipió una rellación col cámara Coleman Laffon, col que se casó y tuvo un fíu: Homer (2002). El matrimoniu divorcióse en 2007.

• Wikimedia Commons acueye conteníu multimedia sobre Anne Heche .
• Anne Heche na Internet Movie Database (n'inglés)
• Anne Heche na Internet Broadway Database (n'inglés)
• Anne Heche n'AllMovie (n'inglés)
• Anne Heche n'Instagram