Стэфанас Цыцыпас

Нарадзіўся ў Афінах 12 жніўня 1998 года ў сям’і Апосталаса Цыцыпаса і Юліі Апосталі (у дзяцінстве — Сальнікава). Маці Стэфанаса ў мінулым была радавай тэнісісткай і ўваходзіла ў топ-200, а таксама ўдзельнічала ў Кубку Фэдэрацый.Дзед па лініі маці таксама быў родам з Радавага Зьвязу і зьяўляўся прафесыянальным футбалістам.

2017 год

Дэбютаваў на турнірах Вялікага шлема на Ралян Гарос 2017, дзе саступіў вэтэрану Іва Карлавічу з Харватыі ў першым коле спаборніцтваў. У кастрычніку добра выступіў на турніры ў Бэльгіі European Open. Будучы кваліфайярам дайшоў да паўфіналу. На шляху да паўфіналу ўзяў рэванш у Іва Карлавіча за паразу ўва Францыі, а таксама атрымаў сваю першую перамогу над гульцом з топ-10 Давыдам Гафэнам, які выступаў на дамашняй пляцоўцы й быў першым сеяным турніру.Гэты пасьпяховы выступ дазволіў Цыцыпасу падняцца ў першую сотню рэйтынгу АТП.

2018 год

На першым турніры Вялікага шлема склаў ракетку ўжо ў першым круге, дзе саступіў Дзянісу Шапавалаву з Канады у трох партыях.

На грунтовым турніры ў Барсэлёне выйшаў у свой першы фінал турніра сэрыі АТП 500. На шляху абгуляў трох гульцоў з топ-20, уключаючы аўстрыйца Дамініка Ціма. У фінале нічога ня змог супрацьпаставіць Рафаэлю Надалю — 2-6 1-6. Дзякуючы гэтаму выступу ўвайшоў у топ-50.На Адкрытым чэмпіянаце Францыі прайшоў першы раўнд, але ў другім саступіў будучаму фіналісту Дамініку Ціму.

На Ўімбэлдане ўпершыню за кар’еру ўвайшоў у лік сеяных і атрымаў 31-шы нумар пасеву. Змог дайсьці да 4 кола, на шляху перамог Грэгуара Барэрэ, Джарэда Дональдсана і Томаса Фабіяна. У 4 раўндзе саступіў амэрыканцу Джону Ізнэру у трох партыях — 4-6 ⁸6-7 ⁴6-7.

Пасьпяхова выступіў на амэрыканскай сэрыі турніраў на хардзе.Выйшаў у паўфінал Вашынгтону, а таксама дайшоў да фіналу спаборніцтваў на Роджэрс Кап у Канадзе. Абгуляў чатырох прадстаўнікоў топ-10, уключаючы перамогі над Дамінікам Цімам у другім коле 6-3 7-6⁶, Новакам Джокавічам у трэцім 6-3 ⁵6-7 6-3, Аляксандрам Зьверавым у чвэрцьфінале 3-6 7-6¹¹ 6-4, Кэвінам Андэрсанам у паўфінале ⁴6-7 6-4 7-6⁷. У фінале турніру атрымаў паразу ад першай ракеткі сьвету Рафаэля Надаля 2-6 ⁴6-7.

На Адкрытым чэмпіянаце ЗША саступіў у другім раўндзе расейцу Даніілу Мядзьведзеву, будучы 15-м сеяным турніру.

У кастрычніку 2018 перамог на турніры ў Стакгольме, пераадолеўшы супраціў Фабія Фаніні і Эрнэста Гулбіса. Напрыканцы сязону заваяваў тытул на турніры Next Gen ATP Finals і быў названы самым прагрэсуючым гульцом АТП у сязоне.

2019 год

На Адкрытым чэмпіянаце Аўстраліі 2019 змог прайсьці да паўфіналу. Па ходу турніра змог выбіць свайго куміра Роджэра Фэдэрэра ў чацьвёртым коле спаборніцтваў. У паўфінале йзноў саступіў Рафаэлю Надалю. У лютым заваяваў свой другі тытул у кар’ере — 2019 Open 13 Provence. На наступным тыдні дайшоў да фінала ў Дубаі, дзе паразу Стэфанасу нанес Роджэр Фэдэрэр. Гэты посьпех дазволіў Цыцыпасу прарвацца ў першую дзясятку рэйтынгу.

На грунтовым турніры ў Эштарыле здабыў тытул. Праз тыдзень дайшоў да фіналу турніра сэрыі Мастэрс 1000 у Мадрыдзе, дзе перамог Зьверава і Надаля, але саступіў Новаку Джокавічу.Ралян Гарос скончыў на стадыі 4 раўнда, дзе саступіў былому чэмпіёну Станісласу Ваўрынке ў пяці сэтах.

На Ўімбэлдане і US Open скончыў свой выступ ужо ў першым раўндзе, атрымаўшы паразу ад Томаса Фабіяна і Андрэя Рублёва. Але гэтыя няўдачы не памяшалі Стэфанасу кваліфікавацца на выніковы турнір ATP Finals. У групавых спаборніцтвах перамог Зьверава і Мядзьведзева, саступіў Надалю. Гэта не перашкодзіла Цыцыпасу выйсьці ў паўфінал турніра, дзе ён разабраўся з Роджэрам Фэдэрэрам і выйшаў у фінал.У фінале яго супэрнікам быў Дамінік Цім з Аўстрыі. Стэфанас аддаў першы сэт на тай-брэйку, але ўзяў наступныя две партыі і стаў пераможцай турніру ⁶6-7 6-2 7-6⁴.Скончыў сязон на шостым месцы рэйтынгу.

2020 год

На Адкрытым чэмпіянаце Аўстраліі дайшоў толькі да 3 раўнда, дзе саступіў Мілашу Раонічу з Канады. Узяў тытул на турніры ў Марсэлі.

Таксама ў трэцім раўндзе саступіў на Адкрытым чэмпіянаце ЗША, дзе сустркаўся з харватам Борнай Чорычам.

Адкрыты чэмпіянат Францыі быў пасьпяховым для грэка. Яму ўдалося дасягнуць паўфінала турніра. У першым коле адгуляўся з ліку 0-2 па партыях з Хуамэ Мунарам 4-6 2-6 6-1 6-4 6-4, у наступных 4 раўндах не аддаў ні сэта Пабло Куэвасу, Аляжу Бэдэнэ, Грыгору Дымітраву і Андрэю Рублёву перад тым, як саступіць першаму сеянаму Новаку Джокавічу ў пяці сэтах 3-6 2-6 7-5 6-4 1-6.

2021 год

Аўстраліян Оўпэн пачаў з праходу ў паўфінал. На сваім шляху адолеў Жыля Сымона 6-1 6-2 6-1, Танасі Какінакіса ⁵6-7 6-4 6-1 ⁵6-7 6-4, Мікаэла Імэра 6-4 6-1 6-1. Італьянец Матэа Берэціні зьняўся з матчу чацьвёртага раўнда і Стэфанас без барацьбы прайшоў у чвэрцьфінал, дзе яго супэрнікам стаў Рафаэль Надаль. Пасьля паражэньня ў першых 2 сэтах Цыцыпас здолеў перамагчы ў наступных 3 партыях — 3-6 2-6 7-6⁴ 6-4 7-5. Ён стаў толькі другім гульцом пасьля Фабія Фаніні, які змог перайграць Надаля пасьля ліку 0-2 па сэтах. У паўфінале ня змог нічога супрацьпаставіць Даніілу Мядзьведзеву 4-6 2-6 5-7.